Bir sheteldik 60 myń teńgeni taksıst dosyma ózi bere salǵan - Astana qalasynyń turǵyny
ASTANA. QazAqparat - Astanada taǵy bir taksı júrgizýshisi týrıstti aldap ketti. Astana qalasynyń turǵyny Erkebulan Jumanovtyń aıtýynsha, ondaı jaǵdaılarǵa sheteldikterdiń ózderi sebepshi bolyp jatady. Máselen, bir frantsýz Qazaqstannan keterde taksıstke 60 myń teńgeni óz qolymen bere salǵan, dep xabarlaıdy QazAqparat tilshisi.
"Negizi, sheteldikterdiń ózderi taksısterdi kóp aqshaǵa úıretip qoıady. Mysaly, meniń Tursyn deıtin bir tanysym shetel azamatyn Táshenov kóshesinen áýejaıǵa aparyp tastaǵan. Sóıtse, ol adam óz eline ketip bara jatyr eken. Qaltasyndaǵy barlyq teńgelerdi Tursynǵa bere salypty. "Frantsııada bul aqshany ne qylamyn?" dedi de, bere saldy. Sanap qarasa, 60 myń teńge. Ol qýanǵannan birden mashınasyn qoıyp, "toılap" ketken. Sondyqtan bul jerde tek taksısterdi ǵana kinálaý durys emes. Jańaǵy oqıǵany estigender maǵan da sondaı klıent kezdesse eken dep oılaıdy. Sheteldikti kórse, aqshany elestetedi. Sosyn neshe túrli qýlyqqa barady. Osylaısha, Tursynǵa aqshasyn berip ketken frantsýz sııaqty sheteldikter jergilikti taksısterdi qalaı dániktirip qoıǵanyn ózderi de bilmeıdi", - deıdi Jumanov.
Onyń aıtýynsha, sheteldikter kóp jaǵdaıda taksı qyzmeti úshin kóp aqsha berip qoıǵandaryna mán bermeıdi. Aldanyp qalǵandaryn bilse de, quqyq qorǵaý organdaryna aryz jazbaıdy. "EKSPO-ǵa deıin bir frantsýzdardy 50 myń teńgege QazMunaıGazǵa deıin ákelip tastaǵan jigitter bar. Nemisterdi Nursaıaǵa 30 myń teńgege aparǵan taksıster de boldy. Ondaı jaǵdaılar kóp qoı. Sol kezde aryz túspegennen keıin eshkimdi izdemeıdi. Al osy jolǵy sheteldikter "taksany" salystyrǵan bolýy kerek, birden quqyq qorǵaý organdaryna xabar túsirdi. Árıne, tártiptiń bolǵany durys. Biraq taksı aqysyn qymbat alý áreketteri bizde ǵana emes, barlyq jerde bar ǵoı", - dep atap kórsetti Erkebulan Jumanov.
Aıta keteıik, elordada Germanııa azamaty polıtsııaǵa aryzdandy. Shaǵymǵa sáıkes, ony áýejaıdan qonaq úıge deıin aparǵany úshin 16 myń teńge alǵan . Buǵan deıin bir taksı júrgizýshisi Astanaǵa kelgen týrısti qonaq úıge aparǵany úshin 40 myń teńge alǵan. Sol úshin jumystan qýyldy. Artynan ol aqshany sheteldik azamatqa qaıtaryp berdi.
