Bir shańyraqtyń astyna biriktiretin uly kúsh - memlekettik til - I. Elekeev
ASTANA. 10 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Irak Elekeev til máselesin kóterip, elimizdiń qorǵanys salasynda qazaq tilin tereńirek engizý máselesin atap ótti.
«Ult pen ultty bir-birine degen syılastyq pen senim, salt-dástúrine kórsetilgen qurmet jaqyndastyratyny anyq. Sonymen qatar bir shańyraqtyń astyna biriktiretin uly kúsh - memlekettik til. Sońǵy jyldary Qazaqstan halqy Assambleıasynyń óńirlerdegi birlestikteri de, ár túrli ulttardyń mádenı ortalyqtary da óz tilderi men salt-dástúrin jańǵyrtýmen qatar óz ishterinde arnaıy kýrstar ashyp, memlekettik tildi meńgerý ústinde. Bul jaqsy bastama. Adam tildi bilgen saıyn sana-sezimi tolyǵa túsedi, ózge ulttardyń jan-dúnıesin túsinedi. Ómirde ózine jaqyn dostar jınaıdy. Qyzmet barysynda da tildi bilgenniń tıimdiligi óte zor. Osyny uǵyna bilgen ózge ult ókilderi «Qazaqstanda turyp, óz elimniń tilin bilýim kerek!» degen patrıottyq sezimmen memlekettik tildi eshqandaı qıyndyqsyz meńgerip alýda. Qazir qazaq tilinde erkin sóıleı alatyn qazaqstandyqtar óz tilin úırenýge talpynys jasamaı júrgen keıbir qandastarymyzǵa úlgi bolyp otyr», - dedi depýtat.
Sonymen qatar, I. Elekeev qosymsha qarjy bólmeı-aq memlekettik tildi úırengisi keletin azamattarǵa kómek kórsetý qajettigin alǵa tartady. «Máselen, orys jáne basqa ulttar tilinde dáris beretin mektepterde ashyq sabaqtar memlekettik tilde júrgizilse, ol da bir ıgilikti is bolar edi. Orta arnaýly jáne joǵary oqý oryndarynda saıası jáne mádenı is-sharalardy memlekettik tilde ótkizý qolǵa alynsa, ol da oń bastama bolatyny sózsiz», dedi ol. Budan bólek, depýtat tildi úırenýdiń taǵy bir ádisi retinde qorǵanys salasynyń qyzmetin tolyqtaı memlekettik tilge kóshirý kerektigin alǵa tartty. «ıAǵnı, áskerı komıssarıattan bastap azamattarymyz qazaq tilinde qabyldanýy tıis. Búgingi tańda áskerde sapqa turýǵa, júrýge beriletin buıryqtar ǵana memlekettik tilde aıtylyp júr. Ol azdyq etedi. Sondyqtan áskerı ómirdiń tynys-tirshiligi memlekettik tilde júrgizilýi kerek. Qazaqstannyń jáne álemniń saıası jańalyqtary, elimizdiń ishki jáne syrtqy jaǵdaıy týraly málimetter aıtylatyn saıası jattyǵý sabaqtary memlekettik tilde ótkizilse, tildi úırený úshin birinshi kezekte jaýyngerlerimizge jasaǵan kómegimiz bolar edi», - dedi I. Elekeev.
