«Bir sarynǵa túsip ketken ákimder esebin ótkizýdiń arnaıy erejesin jasaý kerek pe?» - respýblıkalyq basylymdarǵa sholý
***
«Keshe Memleket basshysy - Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen Qorǵanys mınıstrliginiń keńeıtilgen alqa májilisi bolyp ótti», - dep jazady «Egemen Qazaqstan» gazeti. Vedomstvoǵa áskerı kásiptiń bedelin arttyrý, jastarǵa patrıottyq tárbıe berý jónindegi jumystardy kúsheıtýdi tapsyrǵan Memleket basshysy Qarýly Kúshterdi qarjylandyrýdyń 2010 jyly 171 mıllıard teńgeni qurap, al ústimizdegi jyly 200 mıllıard teńgege jetkenin atap kórsetken. «Sizderdiń mindetterińiz Qazaqstan Qarýly Kúshteriniń bolashaqta HHІ ǵasyrdyń álemdik áskerı standarttaryna sáıkes kelýi úshin qajet degenniń bárin jasaý», - dedi Elbasy. Qorǵanys mınıstrliginiń ótken jylǵy atqarǵan jumystary, aǵymdaǵy jylǵy mindetteri jáne Prezıdent júktegen tapsyrmalar jaıynda keńirek bilgińiz kelse, «Qarýly kúshter qýaty arta túsýde» degen maqalaǵa nazar salyńyz.
Osy basylymda AQSh-tyń saıası ǵylymdar doktory Rýf Nılsennyń halqymyzdyń birligine taǵy bir márte syn bolatyn úlken saıası oqıǵaǵa, aldaǵy Prezıdenttik saılaýǵa qatysty paıymy jarııalanyp otyr. «Prezıdent Nursultan Nazarbaevtyń óziniń ókilettigin uzartý týraly búkilhalyqtyq referendým ótkizýden bas tartýyna qatysty ózimniń pikirimdi bildirgendi jón kórip otyrmyn. Referendým týraly ıdeıanyń jan-jaqty qoldaý tabýy Qazaqstan halqynyń Prezıdentke úlken senimin aıǵaqtaıdy. Soǵan qaramastan, atalǵan sheshimnen bas tartý, onyń ústine merziminen buryn saılaý ótkizý týraly usynysy Qazaqstan basshysynyń demokratııa qundylyqtaryna jaqyndyǵy men óz halqynyń demokratııa maqsattaryna senimin kórsetip berdi», - deıdi sheteldik ǵalym.
***
Aldaǵy sáýirdiń 3-i kúni ótetin kezekten tys prezıdenttik saılaýdyń bolǵanynan boladysy qyzyq bolyp tur. Solaı demeske shara joq. Óıtkeni el basqarýdan dámelilerdiń biri memlekettik tildegi emtıhannan súrinse, qazaq tilin erkin meńgergenin dáleldeı turyp saılaýǵa túsýden bas tartqandar da tabyldy. Bul jaıynda «Aıqyn» gazetiniń juma kúngi nómirindegi «Abaıdy bilmegen adamnan ne úmit, ne qaıyr?» degen maqalada egjeı-tegjeıli baıandalǵan. «Bir qyzyq jaıt, lıngvıstıkalyq komıssııaǵa emtıhan tapsyrǵan azamattardyń keıbiri qazaqtyń bas aqyny Abaıdy bilmeıtin bolyp shyqqan. M.Joldasbekovshe aıtsaq, «Abaıdy bilmegen adamnan ne úmit, ne qaıyr?». Taǵy bir qyzyǵy, oppozıtsııalyq partııalardyń birqatary ázirge úmitker usynbaı otyr. Bálkim, olar memlekettik tilden ótetin emtıhannan júreksinetin shyǵar...», - dep jazady basylym.
«Aıqyn» gazetiniń jazýynsha, Premer-mınıstrdiń birinshi orynbasary, Shańǵy jarystary ulttyq federatsııasynyń prezıdenti Ómirzaq Shókeev VІІ Qysqy Azııa oıyndarynda elimizdiń Kók baıraǵyn asqaqtatqan shańǵy sportynyń sheberlerin jeńisimen quttyqtap, ýáde etilgen qarjylaı syı-sııapattaryn qoldaryna tabys etken. Sonymen qatar aldaǵy Norvegııanyń Oslo qalasynda ótetin Álem chempıonatynda shańǵyshylarymyzǵa sáttilik tilegen. Jalpy Oslodaǵy álemdik dodaǵa Qazaqstan quramasynyń áıelder toby men erler toby da alty-alty sport túrinen synǵa túspek. Sport mamandary erler arasynda Alekseı Poltoranın, Nıkolaı Chebotko, Sergeı Cherepanov pen Evgenıı Velıchkovqa erekshe úmit artyp otyr.
***
«Alash aınasy» gazetiniń turaqty «Dat!» aıdarynda hımııa ǵylymynyń doktory, professor Hakim Sýerbaevpen aradaǵy suhbat «Hımııasyn damytqan eldiń ekonomıkasy da qaryshtaı túsedi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Biz qazir jyrtqysh, jabaıy kapıtalızm ornaǵan zamanda kún keship jatyrmyz. Kezeń aýyspaly bolyp tur. Kúni erteń ne kútip turǵanyn eshkim dóp basyp, boljaı almaıdy. Sondyqtan qazaqtyń hımııa ónerkásibin jandandyrýǵa kúsh salyp, osy salada brend jınaýǵa barynsha peıil tanytqanymyz abzal. Sonda biz keler urpaq aldynda júzimiz jaryq, eńsemiz tik bolady», - deıdi.
«Bir sarynǵa túsip ketken ákimder esebin ótkizýdiń arnaıy erejesin jasaý kerek pe?». Osy saýal «Alash aınasy» gazetiniń «Oı-kókpar» aıdarynda kóterilip otyr. Elbasynyń ákimderge halyqqa esep berýin mindettegen tapsyrmasy jaqsy bastama ekendigin, alaıda bul shara uzyn-sonar baıandama jasaý dep túsinetin jaǵdaıǵa jetkenin atap ótken Májilis depýtaty Qurmanǵalı Ýálı: «Eger ákim bir kabınette otyryp almaı, jospar boıynsha tynymsyz eńbek etip, halyqtyń kóńilinen shyǵatyn isterdi tyndyrsa, ashyq esep berýden qashpaıdy. Sonda ǵana qazirgideı halyqqa beriletin oryndardy shekteý, suraq-jaýapqa arnaıy daıyndalǵan adamdardy ǵana qatystyrý sııaqty keleńsizdikter oryn almas edi», - deıdi. Al «Nur Otan» HDP Almaty qalasy Medeý aýdandyq fılıaly tóraǵasynyń birinshi orynbasary Almasbek Nuǵmanov: «Menińshe dál osy ákimder esebin ótkizýdiń arnaıy erejesin jasaýdyń qajeti shamaly sııaqty. Sebebi qazir ákimderdiń esebin alyp qaraıtyn bolsaq, bári de demokratııalyq talaptarǵa saı ótkiziledi», - dep óz paıymyn alǵa tartady.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Qazaqstan Respýblıkasy Parlamenti Senatynyń Tóraǵasy Qasym-Jomart Toqaevty qabyldady. «Senat Tóraǵasy Prezıdentti Senattyń zań shyǵarmashylyq qyzmetiniń aǵymdaǵy jáne perspektıvalyq baǵyttarynan jáne Venada ótetin EQYU Parlamenttik Assambleıasynyń qysqy sessııasynyń otyrysyna daıyndyq barysynan habardar etti», - dep jazady basylym.
