Bir ózi 110 myń adamǵa qyzmet kórsetip otyrǵan emhanalar bar – Astana ákimi
ACTANA. QazAqparat – Astana ákimi Jeńis Qasymbek emhanalardy jekeshelendirý máselesi týraly pikir bildirdi, dep habarlaıdy QazAqparat tilshisi.
Qala ákiminiń kásipkerlerimen kezdesýinde, medıtsına sapasyn arttyrý úshin emhanalardyń keıbirin jekeshelendirý týraly usynys aıtyldy.
«Bul máseleni birjaqty qaraýǵa bolmaıdy. Óıtkeni jeke menshik emhanaǵa barǵysy kelmeıtin sanat ta bar. Meniń qolymda osy sıpattaǵy, jeke emhanalar qyzmetterdiń tolyq jıyntyǵyn kórsetpeıtini týraly ótinishter kóp. Keshe ǵana emhana salǵysy keletin ınvestorlar kompıýterlik tomagrafııa, magnıttik-rezonansty tomagrafııa sııaqty kúrdeli qondyrǵylarsyz salýǵa tyrysyp jatqany týraly estidik.
Memlekettik emhanalardyń bári de halyq qalaǵandaı sapaly qyzmet kórsete bermeıdi. Olardyń deńgeıin sapaly jeke menshik emhanalarmen teńestirý qajettigi bar. Sondyqtan ár emhananyń máselesin jeke qaraımyz. Jańa emhanalar salý máselesi boıynsha búkil ınvestorlarmen kezdesemiz. Sol kezde ortaq sheshim tabamyz dep oılaımyn», - dedi Jeńis Qasymbek.
Sondaı-aq, keleshekte qalanyń qaı bólikterinde memlekettik emhanalar salynatynyn aıtty.
«Aldyńǵy kúni ǵana biz qalada jeke menshik emhana salǵysy keletin iri ınvestorlarmen kezdesken bolatynbyz. Kelesi aptada taǵy kezdesip, qurylys túsip jatqan jańa aýdandardy qarastyrý týraly kelistik. Emhanaǵa degen suranys bar. Bizde bir ózi 110 myń adamǵa qyzmet kórsetip otyrǵan emhanalar bar. Qalypty jaǵdaıda qalypty emhanalar 60-70 myń adamǵa qyzmet kórsetýi kerek. Biz emhana salý máselesin ádiletti oılastyrýǵa barynsha tyrysamyz.
Memlekettik emhanalardy tek jeke sektor, bıznes barǵysy kelmeıtin aýdandarda ǵana salamyz. Mysaly, Óndiris, Temirjol, Kirpishti sııaqty aýdandarda memlekettik emhanalar salynady», - dedi qala ákimi.
