Bir otbasynyń 3 adamy gazdan ýlanyp kóz jumdy - Túrkistan oblysy
TÚRKІSTAN. QazAqparat - Túrkistan oblysynda gazdyń ıisinen bir otbasyndaǵy 3 adam kóz jumdy. Qaıǵyly jaǵdaı Saryaǵagsh aýdanyndaǵy Qablanbek aýylynda bolǵan, dep habarlaıdy QazAqparat tilshisi.
Gaz taratýshy mekemeniń habarlaýynsha, 18 jeltoqsan kúni bir úıden úsh adamnyń máıiti tabylǵan.
«Gazdyń ıisinen ýlanyp, Rýstemov Bahtııar (1960 j.t), Rýstemova Altynaı (1961j.t) jáne Rýstemov Marat (1989 j.t) kóz jumǵan. Oqıǵa ornyna jetken avarııalyq qutqarý brıgadasy ashanada ornatylǵan úı jylytý peshinde ahaýdy anyqtady. Peshtiń tútin shyǵaratyn murjasyn boıaý bankasymen jaýyp qoıǵany belgili boldy. Jylytý qazandyǵynyń tartqysh sensory ajyratylǵandyqtan ıis ishke taraǵan. Onyń ústine tehnıkalyq qyzmet kórsetý kelisimsharty da jasalmaǵan bolyp shyqty. Qazirgi tańda qaıǵyly jaǵdaıdyń sebep-saldary jan-jaqty tekserilýde» delingen habarlamada.
Dál osyndaı qaıǵyly jaǵdaı Shymkent qalasynda da tirkeldi. 18 jeltoqsan kúni jekemenshik úılerdiń birinde gazdyń ıisinen ýlanǵan 36 jastaǵy kelinshek kóz jumdy.
«Túngi saǵat 23:27-de oqıǵa ornyna kelgen avarııalyq qutqarý brıgadasy jýyný bólmesinde sý jylytqysh peshtiń ornatylǵanyn, onyń ıis shyǵaratyn murjasy durys jumys istemegenin anyqtaǵan. Onyń ústine bólmeniń terezesi de jabyq turǵany anyqtaldy. Qazirgi tańda qaıǵyly jaǵdaıdyń sebep-saldary tekserilip jatyr» delingen habarlamada.
Aıta keteıik, ótken jyly Túrkistan oblysy men Shymkent qalasynda jylytý maýsymynda peshterdiń talapqa saı ornatylmaýy men durys jumys istemeýi saldarynan 32 adam mert bolsa, onyń 8-i bala bolǵan.
