Bir otar qoıymen birge órtenip ketken shopanǵa qatysty tergeý júrgizilýde
ASTANA. QazAqparat - Qostanaı oblysynyń ishki ister departamenti bir otar qoıymen birge órtenip ketken shopanǵa qatysty qylmystyq is qozǵady, dep habarlaıdy «QazAqparat» HAA tilshisi.
Bul týraly Qostanaı oblysy ІІD jedel kezekshisi Erbolat Qusaıynov habarlady.
«Qaza tapqan shopan - Oralbaev Sekebaı Ábdibekuly, 1961 jyly týǵan. Shopannyń ólimi faktisi boıynsha qylmystyq is qozǵaldy. Ajal qushqanda qoıshy jalǵyz bolǵan jáne otar qoı «Aıdos» sharýa qojalyǵyna tıesili bolǵan. Órt saldarynan 1664 bas qoıdyń 1406-sy qyrylǵan», - dedi ol.
Óz kezeginde Qostanaı oblysy tótenshe jaǵdaılar departamenti órt sebebiniń ázirge belgisiz ekenin habarlady.
«Aıdos» sharýa qojalyǵynyń shopany Aralbaı aýylynan 30 shaqyrym jáne Albarbóget aýyldyq okrýginiń Kókalat aýylynan 35 shaqyrym jerde ornalasqan «Kúzdikqarasý» jerinde qoı jaıyp júrgen jáne bul jaıylymdar «Aıdos» ShQ jerinen jyraqta, memlekettik jer qorynyń menshiginde bolǵandyqtan, oqıǵa týraly eshkim estimegen. Jangeldi aýdanynyń ІІB qyzmetkerleri órt sebebin anyqtap jatyr», - dep habarlady departament.
Qostanaı oblysy TJD memlekettik til jáne aqparat tobynyń bas mamany Ýálıhan Dýsanovtyń aıtýynsha, kýágerlerdiń bolmaýynan órt sebebin anyqtaý qıynǵa soǵyp jatyr.
«Ázirge adamı nemese tehnogendi faktor dep aıtýǵa erte. Órt eldi mekennen jyraqta, adam júrmeıtin jerde bolǵan», - dedi ol.
Eske sala ketsek, Qostanaı oblysynda 1500 bas qoı shopanymen birge órtenip ketken. Aldyn ala boljam boıynsha, tilsiz jaý naızaǵaıdyń túsýinen tutanýy múmkin.
