Bir oblysty shetelge berý týraly jalǵan aqparat avtoryna qylmystyq is qozǵaldy – Bas Prokýratýra

ASTANA. QazAqparat - Áleýmettik jeli qoldanýshysy Qazaqstannyń bir oblysyn shet memlekettiń paıdasyna beredi degen jalǵan materıal jarııalaǵan. Atalǵan jaıtqa qatysty elimizdiń Bas Prokýratýrasy resmı túsinik berdi, dep habarlaıdy QazAqparat atalǵan vedomstvoǵa silteme jasap.

«Anonımdi telegram arnalardyń birinde Qazaqstannyń bir oblysyn basqa eldiń paıdasyna ıelikten shyǵarý týraly úndeý qamtylǵan arandatýshylyq materıal jarııalandy. Materıaldyń avtory anyqtaldy. Ol Qazaqstanǵa kelgen sheteldikterdiń qataryna jatpaıdy. Qazirgi ýaqytta alys sheteldiń birinde turady. Bul syrttan baǵyttalǵan josparly jáne maqsatty aktsııa. Onyń nysany - Qazaqstandaǵy jaǵdaıdy turaqsyzdandyrý», - dedi QR Prokýratýrasynyń ókili Serik Ádilkenuly.

Onyń aıtýynsha, jelide jarııalanǵan materıaldyń mazmuny jalǵan aqparat taratyp, ulttyq arazdyqty qozdyrý maqsatyn kózdeıdi.

«Materıalda kórsetilgen áreketter QR Qylmystyq kodeksiniń 174-i, 180-i jáne 274-i baby boıynsha qylmystyq jaýapkershilik pen jazaǵa ákelip soǵady. Atalǵan separatıstik shaqyrýlar faktisi boıynsha 5 jyldan 10 jylǵa deıin bas bostandyǵynan aıyrýdy kózdeıtin QR Qylmystyq kodeksiniń 180-i babynyń 2-bóligi boıynsha qylmystyq is qozǵaldy. Osyǵan baılanysty azamattardy arandatýshylyqqa berilmeýge shaqyramyz. Osy sekildi materıaldar men úndeýlerdi jarııalap, taratýshylar qatań qylmystyq jaýapkershilikke tartylatynyn nazarǵa salamyz», - deıdi ol.

/span>