Bir nómirde birneshe JSN – Praımerızde qandaı erejeler buzyldy

NUR-SULTAN. QazAqparat – «Nur Otan» partııasynyń ishki saılaýynan 34 úmitker shyǵaryldy, onyń 28-i pikirtalasqa qatyspaǵan. Bul týraly «Nur Otan» partııasynyń Partııalyq baqylaý komıtetiniń tóraǵasy Pavel Kazantsev málimdedi, dep habarlaıdy QazAqparat tilshisi.

«Bizde 34 úmitker praımerızden shyǵaryldy, onyń 28-i pikirtalasqa qatyspaǵan. Bul – árıne úlken ereje buzý bolyp sanalady, sondyqtan bul úmitkerler avtomatty túrde shyǵaryldy», - dedi Pavel Kazantsev QR Prezıdenti janyndaǵy Ortalyq kommýnıkatsııalar qyzmetinde.

Onyń aıtýynsha, qalǵan alty úmitkerdiń de óreskel ereje buzǵany anyqtaldy.

«Munda ár túrli kemshilikter anyqtaldy. Partııa músheligine qabyldaý tártibi saqtalmaǵan, ıaǵnı qosymsha daýys jınaý úshin bastaýysh partııalyq uıymdardy oıdan qurǵan. Odan keıin jalǵan telefon nómirlerin qoldanyp, bir nómirge birneshe JSN tirkep qoıǵan nemese túrli JSN túrli nómirlermen daýys bergen, sim-kartalardyń barlyǵy tamyz aıynda satyp alynǵan. Aldaý jolymen daýys jınaǵandar da bar», - dep túsindirdi Pavel Kazantsev.

Barlyq anyqtalǵan buzýshylyqtarǵa tekserý júrgizildi jáne aıyptylar jaýapqa tartyldy.

Eske sala ketsek, «Nur Otan» partııasynyń hatshysy Arman Qyryqbaı «Praımerız 2020» ishki partııalyq irikteýiniń negizgi qorytyndysyn baıandady.

Onyń aıtýynsha, praımerızge uzyn sany 10 990 kandıdat qatysqan jáne onyń 7 143-i ózin-ózi usynǵan. Úmitkerlerdiń ortasha jasy – 43. Onyń 36,7% astamy – áıelder, 29% – 35 jasqa deıingi jastar boldy.

QR Prezıdenti janyndaǵy Ulttyq qoǵamdyq senim keńesiniń múshesi, saıasattanýshy Erlan Saıyrov áleýmettik jelide belsendi bolǵandardyń praımerızde nege jeńilip qalǵanyn túsindirdi.