Bir mıllıonǵa jýyq jumysker medsaqtandyrý jarnasyn tóleýden bosatyldy

ALMATY. QazAqparat – Shaǵyn jáne orta bıznes nysandary 2020 jyldyń 1 qazanyna deıin mindetti áleýmettik medıtsınalyq saqtandyrý tólemderin tóleýden bosatyldy. Sonymen qatar, iri bıznes sýbektileriniń birqatary 1 shildege deıin jarna tólemeıtin boldy. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly málim etti, dep habarlaıdy QazAqparat tilshisi.

Fılıal taratqan málimetke súıensek, úkimet salyq pen áleýmettik tólemderden bosatylǵan shaǵyn jáne orta bıznes nysandarynyń tizimin bekitti. Olardyń qatarynda saýda-sattyq, kólik tasymaly jáne tehnıkalyq qyzmet kórsetý nysandary, bilim berý oryndary, medıtsına, týrızm mekemeleri, meıramhana-qonaq úı jáne oıyn-saýyq salasy, baǵdarlamalyq qamsyzdandyrý, fıtnes nysandary bar.

Sonymen qatar, jeńildikke jeke kásipkerler de ilindi. Atap aıtqanda, kásipkerler qaramaǵyndaǵy qyzmetkerler úshin saqtandyrý tólemderin tóleý mindetinen bosatyldy. Biraq jeke kásipkerlik nysanynyń ıesi retinde ózi úshin jarna tóleýi qajet. Degenmen olar úshin jarna tóleý merzimi bıylǵy jyly maýsymnyń birine deıin shegerildi.

Jalpy alǵanda, bir mıllıonǵa jýyq jumysker memlekettik áleýmettik saqtandyrý qoryna (MÁSQ) jarna men aýdarym tóleýden bosatyldy.

«Memleket tótenshe jaǵdaı kezinde kásipkerlerdi qoldaý maqsatynda osyndaı sharalardy qolǵa alyp otyr. Joǵaryda atalǵan sýbektiler jumys berýshi retinde aýdarym (jalaqynyń 2%) jasaýdy toqtatady. Oǵan qosa, jaldamaly jumyskerler jalaqysynan da jarna ustamaıdy. Soǵan qaramastan, olardyń bári de mindetti áleýmettik medıtsınalyq saqtandyrý paketindegi qyzmetterdi qajetinshe paıdalana alady», - dedi Nurlybek Qabdyqaparov.

Al, úkimet qaýlysyna enbegen bıznes nysandary jeńildikterdi paıdalanyp, jarnalar men aýdarymdardy 1 maýsymnan keıin tóleı alady.

N.Qabdyqaparov 1 qazanǵa deıin jarna tólemegeni úshin jınaqtalatyn qaryz jaıyn da túsindirdi. Aıtýynsha, zań jarnalar men aýdarymdardy osy ýaqyt aralyǵynda tolyq toqtatyp tastaýǵa múmkindik bermeıdi. Sondyqtan Medıtsınalyq saqtandyrý qory ol máseleni sheshý joldaryn qarastyryp jatyr.

«Qazir bıznes ókilderi úshin ońaıǵa soǵyp jatpaǵany belgili. Qor osyndaı qıyn shaqta halyqqa qoldaý kórsetý maqsatynda jarna tóleý mindetinen «bosatylǵandardyń» atyna qaryz jınaqtalýyna jol bermeıtin arnaıy quqyqtyq norma engizý týraly bastama kóterdi. Qazir osy ózgertýlerdi zańdyq turǵyda bekitý jumystary júrip jatyr, aldaǵy ýaqytta úkimet qaraýyna beriledi», - dedi fılıal dırektory.

Tólemderden bosatylǵan sanattardyń tolyq tizimi QR Úkimetiniń 2020 jyly 20 sáýirdegi №224 qaýlysynda kórsetilgen.