«Bir maqsat, bir múdde, bir bolashaq» jyr músháırasy jarııalandy

ASTANA. QazAqparat - QR Mádenıet jáne sport mınıstrliginiń Tilderdi damytý jáne qoǵamdyq-saıası jumys komıtetiniń qoldaýymen jáne Qazaqstannyń jas kásipkerleri qaýymdastyǵynyń uıymdastyrýymen Astana qalasynda 9 qazan kúni «Bir maqsat, bir múdde, bir bolashaq» atty jyr músháırasy ótkiziledi.

Jyr saıysy shetelderde turatyn otandastarymyzdyń qatysýymen ótetin halyqaralyq óner festıvaliniń aıasynda uıymdastyrylyp otyr. Baıqaýdyń maqsaty - aqyndyq ónerdi nasıhattaý, sheteldegi qazaq aqyndaryn baıqaýǵa qatystyrý arqyly olardyń otanshyldyq sezimin ushtap, atajurtyna degen súıispenshiligin arttyrýǵa, memlekettik tildiń mártebesin odan ári kóterýge, áli tanyla qoımaǵan jas daryndardy anyqtaýǵa septesý. Baıqaý úsh kezeńnen - úsh óleńnen turady. «Bir maqsat, bir múdde, bir bolashaq» taqyrybyndaǵy birinshi óleńde atameken, el men jer, eldik, patrıottyq máselelerdi jyrlaýdy ózek etý qajet. Ekinshi óleń - sheteldegi qandastar taǵdyry men kóshi-qon týraly bolýy tıis. Úshinshi óleń - erkin taqyryptaǵy óleń. Baıqaýdyń sharttary boıynsha oǵan shetelderdegi otandastarymyz, ár memleketten birneshe aqynǵa deıin qatysa alady, baıqaýǵa qatysýshylar ózderiniń baıqaýdyń erejesine sáıkes óleńder oqıdy. Qazylar alqasy belgilengen Bas júldeden basqa oryndardy úmitkerlerge bólip berýge quqyly, baıqaý jabyq túrde baǵalanady. Músháıraǵa jasy 35-ke deıingi shetelde turatyn nemese elimizden tys aımaqtarda týyp-ósken, qazir atajurtqa oralǵan jas qazaq aqyndary qatysa alady. Baıqaýǵa qatysýshylar 2014 jylǵy qazan aıynyń 8 kúni Astana qalasyna kelip, tirkelýi qajet. Jeńimpazǵa bas júldege - 150 000 teńge, І oryn úshin - 100 000 teńge, ІІ orynǵa - 80 000 teńge, al ІІІ oryn úshin 50 000 teńge kóleminde aqshalaı syılyqtar beriledi. Ótinishter 2014 jyldyń qyrkúıek aıynyń 30 juldyzyna deıin qabyldanady, dep habarlaıdy Ádebıet portaly.