Bir lıtr benzınmen 200 shaqyrym: Almatylyq stýdentter biregeı avtomobıl qurastyrdy
ASTANA. QazAqparat - SatbayevUniversity ınjenerleri 1 lıtr benzınmen 200 shaqyrymnan astam jol júretin biregeı jarys mashınasyn qurastyrdy, dep habarlaıdy QazAqparat Q.Sátpaev atyndaǵy Qazaq ulttyq zertteý tehnıkalyq ýnıversıtetiniń baspasóz qyzmetine silteme jasap.
«Búgin Qanysh Sátbaev atyndaǵy qazaq ulttyq tehnıkalyq ýnıversıteti qabyrǵasynda SURacingTeam stýdentter komandasynyń iSUPrototype 1.0. avtomobıliniń tanystyrylymy ótti. Atalǵan prototıptiń biregeıligi sol, kólik ekologııalyq taza otyn túri - etanolmen júredi. Bul otyn qant quraǵyn, júgerini nemese qyzylshany óńdeý arqyly alynady. Al bolıdtiń biregeı qozǵaltqyshy 1 lıtr benzınmen 200 shaqyrymnan astam qashyqtyqty eńserýge múmkindik beredi», - dep jazdy SatbayevUniversity.
Bolıdti (jarys mashınasy) SatbayevUniversity erikti stýdentteri 3 aıda qurastyrǵan. Mashınanyń motory Hondaaf55e qozǵaltqyshy negizinde jasalǵan. Alaıda, árbir bólshegin ózgertip, bolıdke qajet sıpattamalarǵa beıimdeýge týra kelgen. Qańqasy arnaıy dıýralıýmınıı qubyrlardan, al korpýsy - shyny plastıkten jasalǵan. Júrgizýshi orny aldyndaǵy shyny polıkarbonattan jabylǵan.
Atalǵan prototıp qoldanystaǵy otyn túrlerin damytý, jańa túrlerin tabý maqsatyndaǵy jyl saıynǵy marafonǵa qatysý úshin qurastyrylǵan. Onda 1 lıtr janarmaımen uzaǵyraq qashyqtyqqa júretin avtomobıl jeńiske jetedi. Marafon 1939 jyldan beri Detroıt, London, Sıngapýr, Rıo-de-Janeıro qalalarynda ótkizilip keledi. Bıyl birinshi týrnır Sıngapýrde 8-11 naýryz kúnderi ótpek.
«Bizdiń mindetimiz - Qazaqstandaǵy avtomobıl qurastyrý isin damytý. Sondaı-aq, elimizde otynnyń ekologııalyq taza túrlerine kóbirek kóńil bólingenin qalaımyz. Bizdiń bolıd ǵana emes, jazda ótken EXPO-2017 kórmesi de bolashaqta taza otyn túrlerine basymdyq beriletinin kórsetti», - deıdi SU Racing Team komandasynyń kapıtany Álibek Samatuly.
