Bir qyzmetkerdiń ortasha aılyq ataýly jalaqysy 125 936 teńgege deıin ósken - Statıstıka komıteti
ASTANA. QazAqparat - 2014 jylǵy shildede bir qyzmetkerdiń ortasha aılyq ataýly jalaqysy 125 936 teńgeni qurady, dep habarlaıdy QR Ulttyq ekonomıka mınıstrligi Statıstıka komıteti.
«Ataýly jalaqy ındeksi 2013 jylǵy shildege 111,7%, al naqty jalaqy ındeksi 104,4% boldy.
Salalyq qurylymda eń úlken jalaqy ken óndirý ónerkásibi men karerlerdi qazýda - 253,9 myń teńge (ortasha respýblıkalyq deńgeıden 2,0 esege asty), kásibı, ǵylymı jáne tehnıkalyq qyzmette - 245,2 myń teńge (1,9 esege asty), qarjy jáne saqtandyrý qyzmetinde - 215,6 myń teńge (1,7 esege asty) belgilendi. Eń tómengi jalaqy aýyl, orman jáne balyq sharýashylyǵy qyzmetkerlerinde belgilendi - 63,6 myń teńge, bul el boıynsha orta kórsetkishten 49,5%-ǵa tómen», - delingen habarlamada.
Óńirlik bóliniste eń joǵarǵy jalaqy Atyraý oblysynda belgilendi - 242,4 myń teńge, bul ortasha respýblıkalyq kórsetkishten shamamen 1,9 esege asady. Soltústik Qazaqstan oblysynda 82,8 myń teńgeni qurady, bul el boıynsha ortasha deńgeıden 34,3%-ǵa tómen.
