Bir qyzmetker 20 qylmystyń betin ashty - BQO

ORAL. QazAqparat - Elbasy «Qazaqstan jańa jahandyq naqty ahýalda: ósim, reformalar, damý» atty Joldaýynda salyq salasynyń móldirligin arttyrý, «kóleńkeli ekonomıkany» jaryqqa alyp shyǵatyn tetikterdi iske qosý qajettigin atap kórsetken edi. Osy oraıda bir jyldan astam ýaqyt buryn memlekettik kirister departamenti quramynda qurylǵan ekonomıkalyq tergeýler qyzmeti qarjy, salyq jáne keden salasyndaǵy ekonomıkalyq qylmystardy ashyp keledi.

Atap aıtqanda, BQO boıynsha memlekettik kirister departamenti ekonomıkalyq tergeýler qyzmeti kóleńkeli ekonomıkamen kúres basqarmasy zańsyz kásipkerlik qyzmetke jáne jalǵan aqsha jasaýshylyqqa qarsy is-qımyl bóliminiń bas mamany - erekshe mańyzdy ister jónindegi aǵa ofıtseri Sabyrǵalı Balǵalıev ótken jyl qorytyndysymen QR Qarjy mınıstrligi Memlekettik kirister komıteti jarııalaǵan respýblıkalyq baıqaýda «Úzdik jedel qyzmetker» atalymy boıynsha jeńimpaz atandy.

Departamenttiń baspasóz hatshysy Nazar Qýanǵalıevtiń habarlaǵanyndaı, 2015 jyly Sabyrǵalı Bazarǵalıulynyń jedel materıaldary boıynsha 20 qylmystyń beti ashyldy. Onyń jeke ózi oblys aýmaǵyna 758 myń teńge kóleminde jalǵan aqshanyń kirýine tosqaýyl qoıdy, qylmyskerler sottaldy.

Ótken jyl basynda 39 oıyn avtomaty tárkilenip, 21 oıynhana joıyldy. Jyl boıy QR QK 307-baby 1-bóligi boıynsha 22 qylmys ashylyp, 41 jasyryn oıynhana, 12 jasyryn býkmekerlik keńse, 1 oıyn avtomattary zaly, 1 jasyryn kazıno áshkerelendi. 2,783 mln. teńge tárkilenip, memleket paıdasyna jatqyzyldy. Qylmyskerlerge 6,144 mln. teńge aıyppul salyndy.

S.Balǵalıevtiń tikeleı qatysymen Reseıden qujatsyz bıtýmdy zańsyz tasymaldaý deregi boıynsha 11 qylmystyq is tirkeldi.

Ótken jyldyń sáýir aıynda qala aýdandarynyń birindegi qoımany qaraý kezinde kúmándi marka japsyrylǵan 135 myńnan astam shólmek araq tabyldy.

Sol sekildi mamyr aıynda 68315 shólmek alkogol ónimin lıtsenzııasyz saqtaý jáne ótkizý deregi boıynsha qylmystyq is qozǵalyp, Oral qalalyq sotynyń úkimimen aıypty adamǵa 1 387,4 myń teńge aıyppul salyndy. Oǵan qosa 17,5 mln. teńgeniń alkogol ónimi memleketke ótkizildi.

S.Balǵalıevtiń jedel materıaly boıynsha 26,7 mln. teńgeniń qymbat metaldary zańsyz saqtalǵan úsh qoıma anyqtaldy. Osy derek boıynsha qoıma ıesine 30 AEK kóleminde aıyppul salynyp, tárkilengen 26,7 mln. teńgeniń metaly memleket paıdasyna jatqyzyldy.

Aıta keteıik, S.Balǵalıev 27 jasta. 2009 jyly Jáńgir han atyndaǵy Batys Qazaqstan agrarlyq-tehnıkalyq ýnıversıtetin ekonomıst mamandyǵy boıynsha bitirip, oblys kásiporyndarynda, 2011 jyldan qarjy polıtsııasy organdarynda qyzmet atqarǵan. 2014 jyly Batys Qazaqstan ınjenerlik-gýmanıtarlyq ýnıversıtetin zańger mamandyǵy boıynsha syrttaı támamdaǵan ol sol kezde jańadan qurylyp jatqan BQO boıynsha memlekettik kirister departamentine qyzmetke keldi.