Bir kúnniń ishinde N.Nazarbaevtyń atyna 6 myń saýal kelip tústi
sp;ASTANA. Qarashanyń 10-y. QazAqparat /Arman Asqarov/ - QR Prezıdenti Nursultan Nazarbaevtyń tikeleı jeli arqyly halyqpen tildesýine oraı elordada jumys istep jatqan Baılanys ortalyǵyna osy ýaqytqa deıin 25 myń saýal kelip tústi,
dep habarlaıdy QazAqparat.
Keshe, qarashanyń 9-y kúni halyqtyń joǵary belsendiligi baıqaldy. Osynyń nátıjesinde Elbasynyń atyna bir kúnniń ishinde 6 myńǵa jýyq saýal kelip tústi. Keshe bul kórsetkish 19 myń bolǵan. Búgingi tańda Astana jáne Almaty qalalarynan, Ońtústik Qazaqstan, Qaraǵandy, Shyǵys Qazaqstan jáne Aqmola oblystarynan suraqtar kóptep túsýde.
Esterińizge sala keteıik, 2009 jyly qarashanyń 13-i kúni Qazaqstan Respýblıkasynyń Prezıdenti N.Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana radıosy» boıynsha ótetin tikeleı efırde azamattardyń teleefır, telefon, ınternet jáne SMS habarlamalary arqyly túsken suraqtaryna jaýap beretin bolady. Suraqtardy respýblıka boıynsha +7 (7172) 555-777 telefony men KCell, Beeline, Neo, Altel uıaly baılanysyn paıdalanýshylar úshin SMS habarlamalary arqyly 1111 nómirine jiberýge bolady. Sondaı-aq
www.line.gov.kz saıtynyń tıisti tarmaǵyn paıdalana otyryp, beınesuraqty joldaýǵa bolady. Al jazbasha saýaldy vopros@akorda.kz elektrondyq mekenjaıyna jiberýge múmkindik bar.
«Qazaqtelekom» usynǵan baılanys tegin bolsa, uıaly telefondarǵa arnaıy tólemder qarastyrylǵan. «Tikeleı jeli» kezinde Elbasynyń nazaryna ilikpeı qalǵan saýaldarǵa tıisti memlekettik organdar bir aıdyń kóleminde jaýap ázirlep, saıtqa ornalastyratyn bolady. Al Interneti joq aýyldy jerler úshin ákimdikter janynan qoǵamdyq qabyldaý bólimderi ashylǵan.
