Bir kúndik fırmalar, jalǵan deklaratsııalar ótkenniń enshisinde qalýy tıis - Qarjy mınıstri keden beketteri jaıly

NUR-SULTAN. QazAqparat - Qarjy mınıstri Erulan Jamaýbaev Qazaqstan-Qytaı shekarasyndaǵy keden beketteriniń jumysyn tekserdi, dep habarlaıdy QazAqparat QR Qarjy mınıstrliginiń baspasóz qyzmetine silteme jasap.

Sapar barysynda Mınıstr syrtqy ekonomıkalyq qyzmetke qatysýshylarmen kezdesip, memlekettik organdardyń, «Qazaqstan temir joly» UK» AQ basshylarymen, sondaı-aq quqyq qorǵaý organdarynyń jáne bıznes ókilderimen jumys keńesin ótkizdi.

Mınıstr óz sózinde kedendik shekaradaǵy jumys tártibin túbegeıli qaıta qaraý kerektigin aıtty, bul týraly Memleket basshysy taıaýdaǵy tapsyrmasynda eskertý jasaǵan.

Osylaısha, syrtqy ekonomıkalyq qyzmetti júrgizýge ashyq jáne teń jaǵdaılar jasalatyn bolady. Bul rette, quqyq qorǵaý organdarymen birlesip, onyń ishinde táýekelderdi basqarý júıesin, elektrondyq shot-faktýralardyń monıtorıngi jáne basqa fıskaldyq quraldardy paıdalaný arqyly bıznestiń zańsyz áreketterine qatań sharalar qoldanylatyn bolady.

«Bir kúndik fırmalar, jalǵan deklaratsııalar jáne basqa da osyndaı «oıyndar» ótkenniń enshisinde qalýy tıis. Óz kezeginde biz tıisti kadrlyq sheshimder qabyldadyq», - dedi Jamaýbaev.

Jalpy, memleket syrtqy ekonomıkalyq qyzmetti júzege asyratyn kásipkerler úshin qolaıly bıznes-orta quryp jatqanyn atap ótti. Sáıkesinshe, búginde kedendik ınfraqurylym kezeń-kezeńimen jetildirilýde, ótkizý pýnktteri jańǵyrtylýda.

Kedendik statıstıkadaǵy alshaqtyq deńgeıi memleket pen bıznestiń úılesimdi jumysynyń qorytyndy ındıkatory bolady. Kedenniń qyzmeti ashyq bolýǵa jáne eń bastysy bıýdjetke túsetin túsimderdiń tolyqtyǵyn qamtamasyz etýge tıis, – dep qorytyndylady Mınıstr.