Bir kúnde elimizde 3 bala kópqabatty turǵyn úıdiń terezesinen qulap ketken
NUR-SULTAN. QazAqparat – Keshe elimizde 3 bala kópqabatty turǵyn úıdiń terezesinen qulap ketken, dep habarlaıdy QazAqparat TJK baspasóz qyzmetine silteme jasap.
«2 qyrkúıekte elimizde balalardyń terezeden qulaýyna qatysty 3 oqys oqıǵa tirkeldi. Máselen, Nur-Sultan qalasynda J.Nájimedenov kóshesindegi toǵyz qabatty turǵyn úıde besinshi qabattaǵy páterdiń terezesinen eresekterdiń qaraýynsyz qalǵan 4 jasar bala qulap ketti. Ol aýrýhanada kóz jumdy.
Aqtaýda bes qabatty turǵyn úıde eresekterdiń qaraýynsyz qalǵan 3 jasar bala besinshi qabattaǵy páterdiń terezesinen qulady. Bala túrli jaraqattarmen aýrýhanaǵa jatqyzyldy.
Pavlodar oblysynyń Qalqaman aýylynda tórt qabatty úıdiń tórtinshi qabatyndaǵy terezesinen 4 jastaǵy bala qulap ketti. Ol da túrli jaraqattarmen aýrýhanaǵa jatqyzyldy», delingen habarlamada.
Qutqarýshylardyń aıtýynsha, oqys jaǵdaıǵa ata-anasynyń balany qaraýsyz qaldyrý nemese qasyndaǵy eresekterdiń salǵyrt qaraýy sebepshi bolady. Sondaı-aq kóbinese bul kúndizgi ýaqytta bolady.
Tótenshe jaǵdaılar komıteti osyndaı jazataıym oqıǵalardyń aldyn alý úshin azamattardy kishkene balany jalǵyz qaldyrmaýǵa; qulap ketýden qorǵaýǵa arnalmaǵan masa toryna (moskıt) senbeýge, tereze ashqanda balany nazardan tys qaldyrmaýǵa shaqyrady. Sonymen qatar, balanyń tereze aldyna shyǵyp ketpeýi úshin jıhaz ben tósekti terezeden alysyraq qoıý kerek.
