Bir kúnde Almatyda urlanǵan úsh kólik qylmysynyń izi sýymaı ashyldy
ALMATY. 24 tamyz. QazAqparat /Názıra Eleýhan/ - Ótken táýlikte Almatyda tirkelgen úsh kólik urlaý qylmysynyń izi sýymaı ashyldy. Bul qylmystardy Jol polıtsııasy basqarmasy ekıpajdary, ýchaskelik ýákilder jáne de kólik qylmysyn ashý bóliminiń qyzmetkerleri birlesip áshkereledi.
Ózgeniń kóligin ıemdenip ketkeni jaıyndaǵy birinshi málimetti polıtsııa organdaryna Jetisý aýdanynyń turǵyny túngi saǵat on birler shamasynda habarlaǵan. Jábirlenýshiniń aıtýyna qaraǵanda, onyń úıiniń aýlasynan «Reno» markili jeńil avtokóligi qoldy bolǵan.
«Qala boıynsha «Quryqtaý» jospary engizilip, barlyq polıtsııa beketterine qoldy bolǵan kólik jaıly tolyq aqparattar berildi. Araǵa 13 mınýt salyp Nııazbekov kóshesinde bul temir tulpar JPB ekıpajynyń nazaryna ilikken. Kólik tizgininde otyrǵan 31 jasar er azamat temir tulpar ıesiniń týǵan aǵasy bolyp shyqty. Esirtkiniń býyna eltip alǵan ol bul qylmysqa ne úshin barǵandyǵyn tolyqtaı túsindire almady. Keıinirek belgili bolǵandaı, qylmysker buryn esirtkige qatysty qylmysy úshin jaýapkershilikke tartylǵan bolyp shyqty»,- dep málimdedi Almaty qalalyq ІІD Jol polıtsııasy basqarmasynyń bastyǵy polıtsııa polkovnıgi Arman Sarbasov.
Dál osy kúni keshki saǵat toǵyzdar shamasynda Jedel basqarý ortalyǵyna «Aqsaı» yqsham aýdanynyń turǵyny habarlasyp, bir jarym saǵat buryn «Qalqaman» yqsham aýdanyndaǵy qurbysynyń úıiniń janynan «Toıota Harıer» avtokóliginiń qoldy bolǵandyǵy jaıynda aqparat berdi.
«Qylmyskerdi izdestirýge birinshi bolyp atsalysqan ýchaskelik ýákil jaıaý júrginshiler men kórshilerden jaýap alý nátıjesinde kúdiktiniń keskin-kelbeti jaıynda maǵlumat alady. Óz kezeginde ýchaskelik ýákil jasalǵan tuspaldy fotokeskindemeden ýchaskelik bólimde esepte turatyn kórshiles kósheniń turǵynyn tanıdy. Araǵa 40 mınýt salyp qoldy bolǵan kólik óz ıesine qaıtaryldy. Al, esh jerde jumys istemeıtin kólik urlaǵan adamǵa qatysty qylmystyq is qozǵaldy»,- dedi Arman Sarbasov.
Bul aralyqta Krımınaldy polıtsııa basqarmasynyń jedel ýákilderi «Folksvagen» avtokóligin qýyp áketken 19 jasar jas jigitti quryqtaǵan bolatyn. Onyń aıtýyna qaraǵanda, ol kólikpen qala kóshelerin qydyryp qaıtpaq bolǵan. Alaıda, jedel is-sharalar nátıjesi qylmyskerdiń tehnıkalyq jóndeý ortalyǵynda jumys isteıtindigin anyqtaǵannan keıin jedel ýákilder qylmysker bul kólikti bólshektep satý maqsatynda urlaǵan degen boljam jasap otyr. Qazir bul is boıynsha, tergeý amaldary jalǵasýda.
