Bir kúnde 100- den astam qońyraý qabyldaımyz – polıtsııa kapıtany
ALMATY. QazAqparat - Teatr – kıimilgishten, al polıtsııa jumysy – kezekshi bólimnen bastalady. Dál osy jerge kómekke muqtaj azamattar júginedi. «102» jedel nómiri qylmys pen oqıǵalar týraly barlyq qońyraýlardy qabyldaıdy. Árbir qońyraý saıyn adamnyń taǵdyry sheshiledi. Bul týraly Almaty qalasy Medeý aýdandyq polıtsııa basqarmasynyń kezekshi bóliminiń ınspektory, polıtsııa kapıtany Raıymbek Toıbergenuly aıtty, dep habarlaıdy QazAqparat tilshisi.
Raıymbek Toıbergenulynyń quqyq qorǵaý salasynada qyzmet etip jatqanyna 8 jyl.
« Іshki ister organdarynda 2014 jyldan beri jumys isteımin. Alǵashynda kólik júrgizýshi boldym, keıin ýchaskelik polıtsııa qyzmetkeri atandym. Eki jyl boldy Medeý aýdandyq polıtsııa basqarmasynyń kezekshi bóliminde qyzmet etip kelemin»,- deıdi ol.
Onyń aıtýynsha, kezekshi bólimsheniń jeke quramyna júktelgen mindet, jaýapkershilikti talap etedi. «Teatr – kıimilgishten, al polıtsııa jumysy – kezekshi bólimnen bastalady. Meniń jumysym úlken jaýapkershilikti talap etedi. Biz árbir habarlamaǵa dereý jaýap berip jáne alynǵan aqparatty tekserý úshin tıisti sharalardy qabyldaımyz. Aýyr qylmys jaıynda habarlama kelip tússe, jedel- tergeý toby oqıǵa ornyna shyǵady. «Býran» patrýldik ekıpajy bolsa, kósheler men qoǵamdyq oryndardaǵy quqyq buzýshylyqtardyń jolyn kesýge jiberiledi. Árbir qońyraý saıyn adamnyń taǵdyry sheshiledi»,- deıdi polıtsııa kapıtany.
Spıkerdiń sózinshe, kúnine 100- den astam qońyraý qabyldaıdy.
«Bizge túrli qońyraýlar túsip jatady. Kisi óltirýden bastap usaq qylmystarǵa deıin. Biz kúnine shamamen 100- den astam qońyraý qabyldaımyz. Negizinen «102» nómirine turǵyndar demalys kúnderi men túnde habarlasady. Bir jaǵdaı esimde: saýnada adamdy pyshaqtap ketti degen aqparat aldyq. Áriptesterimiz tez arada oqıǵa ornyna baryp, kúdiktini izin sýytaı ustady. Mundaı jaǵdaılar óte kóp. Jas ofıtser polıtsııa formasyn kııýdi bala kúninen armandaǵan eken. « Bul meniń bala kúngi armanym bolatyn. Maǵan kishkentaıymnan polıtsııa formasy qatty unaıtyn. Men úshin ákem erlik pen namystyń aıqyn úlgisi boldy. Aıtpaqshy, inim de, ápkem de áke jolyn qýdy»,- deıdi ol.
Sonymen qatar, ol polıtsııa qyzmetkeri – halyqtyń qorǵany. Qylmysty ashýda, qaýipsizdikti saqtaýda polıtsııa qyzmetkerleriniń eńbegi zor ekenin tilge tıek etti.
«Polıtsııa qyzmetkeri bolý úshin bilim de, bilik te, bilek te kerek. Sabyr, tózim jáne qajyr-qaırat qajet. Shapshańdyq pen jyldamdyq, tez sheshim qabyldap, jyldam áreket ete bilý qabileti polıtseıge qajetti basty qasıetterdiń biri. Ustamdy bolýy, azamattarmen til tabysa bilýi, sypaıy bolýy da asa mańyzdy»,- dep qortyndylady áńgimesin Raıymbek Toıbergenuly.
