Bir qorap temeki urlap sottalǵan SQO turǵyny aýyldyń qaryn kúrep júr

PETROPAVL. QazAqparat – Soltústik Qazaqstan oblysynyń turǵyny bir qorap temekiniń aqshasyn tólemeı ketkeni úshin jazaǵa tartyldy, dep habarlaıdy QazAqparat tilshisi.

SQO boıynsha qylmystyq-atqarý júıesi departamenti baspasóz qyzmetiniń málimetinshe, Qyzyljar aýdanynyń turǵyny demalysqa Petropavldaǵy dosynyń úıine barǵan.

Qonaq spırttik ishimdik ishkennen keıin jaqyn mańdaǵy dúkenge barǵan. Satýshydan bir qorap temeki surap, alǵannan keıin aqysyn tólemeı qashyp ketken.

Keıin ol bul qylmysqa mas bolǵandyqtan barǵanyn aıtyp, aqtalmaq bolypty.

Er adamǵa aýyrlyǵy ortasha sanatqa jatatyn jáne QR QK 191-babynyń 1-bóligi boıynsha «Tonaý», ıaǵnı bótenniń múlkin ashyq urlaý retinde saralanatyn qylmys jasady degen aıyp taǵyldy.

Bir qorap temekini qoldy etken Qyzyljar aýdany turǵynynyń isi sotta qaraldy.

Sot úkimimen ol endi 300 saǵat qoǵamdyq jumysqa jegiledi jáne probatsııa bóliminiń esebine alyndy.

Aýyldyq okrýg ákimdiginiń mamany belgilegen jumys josparyna sáıkes sottalǵan adam aýyl aýmaǵyn abattandyrý jáne qysta qar kúreý jumysymen aınalysady.

Qyzyljar aýdanynyń probatsııa qyzmeti sottalǵan adamnyń jeke basyn, onyń beıimdiligin, qylmysqa yqpal etýi múmkin turǵyn úı jáne otbasylyq problemalaryn zerdeleý maqsatynda esepke alynǵan adammen ony túzetýge baǵyttalǵan áńgime júrgizdi.

Foto: SQO qylmystyq atqarý júıesi departamenti