Bir qolynda náreste, bir qolynda rýl: Astanadaǵy taksı júrgizýshi áıel anyqtaldy

ASTANA. QazAqparat – Astanada taksı júrgizýshi áıel bir qolyna qundaqtaǵy sábıin ustap, bir qolymen rýldi basqarǵan. Bul týraly áleýmettik jelide taksı jolaýshylarynyń biri jazdy, dep habarlaıdy QazAqparat.

«Taksı shaqyrdym. Rýlde oramal taqqan jas kelinshek. Jolaýshylarǵa arnalǵan aldyńǵy orynda jórgektegi bala jatty», - dep jazady jolaýshy.

5 mınýttan keıin bala jylaı bastaǵan. Áıel sábıdi qolyna alyp, qozǵalysyn jalǵastyrǵan.

«Únsiz otyrýǵa shydamym jetpedi, jónsiz bolsa da júrgizýshi kelinshekti áńgimege tarttym. Balasy bes aılyq. Tańǵy jetiden túske deıin taksıletip, túski astan soń qaıta jumysqa shyǵady eken», - deıdi jolaýshy.

Áleýmettik jelide taraǵan vıdeoǵa Astana polıtsııasy nazar aýdaryp, áıeldi tapqan. Ony jaýapkershilikke tartpaı, túsindirý júrgizýmen shektelgen. Sondaı-aq syılyq ta tartý etken.

«Áleýmettik jelilerdi baqylaý barysynda áıel adamnyń kólik júrgizip kele jatyp, jylap jatqan náresteni qolyna alyp, qozǵalysyn jalǵastyrǵan vıdeojazba anyqtaldy.
Avtoledı bir qolymen balany ustap, ekinshisimen kólikti basqarǵan. Arasynda balasyna qaraı eńkeıip, joldan nazary aýǵan sátter bolǵan.
Elorda polıtseıleri júrgizýshini anyqtady. Onymen balalardy tasymaldaý talaptaryn buzý týraly profılaktıkalyq áńgime júrgizildi.

Sondaı-aq Astana qalalyq Polıtsııa departamenti mamandandyrylǵan batalonynyń qyzmetkerleri áıelge balany tamaqtandyrýǵa arnalǵan arnaıy oryndyq syılady», - delingen polıtsııa habarlamasynda.

Vıdeodan alynǵan kadr