Bir qoly joq amerıkalyq qyz arýlar baıqaýynda jeńiske jetti
ASTANA. 14 maýsym. QazAqparat - Taıaýda amerıkalyq Aıova shtatynda ótken arýlar baıqaýynda bir qoly joq 23 jastaǵy boıjetken jeńimpaz atandy.
Bul týraly SBS News telearnasy habarlady.
Nıkol Kellı (Nicole Kelly) sol jaq qolynyń bilek súıekterinsiz týǵan. Ol 2012 jyldyń mamyrynda Nebraska shtatynyń Lınkolndegi ýnıversıtetin támamdady. Teatrlyq ónerdiń qyr-syryn meńgergen boıjetken búginde Nıý-Iorkta turady. Onyń bolashaqtaǵy armany - Brodveıde jumys isteý.
Aqylyna kórki saı Nıkol úshin «Aıova arýy» ataný kútpegen jaǵdaı. Biraq ol osy jeńistiń arqasynda múmkindigi shekteýli jandardyń máselesine qoǵamnyń nazaryn aýdarýǵa jol ashylatynyn túsinýde. Endi Nıkol qyrkúıek aıynda ótetin AQSh sulýlarynyń tartysyna qatysyp, baǵyn synap kórmek.
