Bir klýbtaǵy 65 adamnyń bári ákimshilik jaýapkershilikke tartyldy - ІІM
NUR-SULTAN. QazAqparat –Karantın talaptaryn buzǵan Almatyda 5, Nur-Sultanda 4 túngi klýb anyqtaldy. Bul týraly Іshki ister mınıstri Erlan Turǵymbaev málim etti, dep habarlaıdy QazAqparat tilshisi.
«Eskertýlerge qaramastan karantın rejımin buzyp ustalyp jatqandar bar. Máselen elordada qyrkúıektiń 25-nen 26-na qaraǵan túni jumys istep turǵan 4 túngi klýb anyqtaldy. Olardyń birinen ǵana tekserý kezinde 65 adam anyqtalyp, olardyń bári de ákimshilik jaýapkershilikke tartyldy. Dál osyndaı jaǵdaı Almatyda da tirkelip, ol qalada 5 túngi klýbtyń jumys istegeni belgili boldy. Olardyń bári de jabylyp, jaýapty adamdardyń bári de jazalandy», - dedi Erlan Turǵymbaev Úkimet otyrysynda.
Onyń aıtýynsha maska rejımin buzǵan 11 800 adam anyqtalǵan.
Eske sala ketsek buǵan deıin Erlan Turǵymbaev quqyq qorǵaý organdary elde karantın rejımin kúsheıtýge daıyn ekenin málimdegen bolatyn.
