Bir keli esirtkini sómkesinde alyp júrgen qostanaılyq qolǵa tústi
QOSTANAI. QazAqparat - Qostanaı oblysy polıtsııa departamenti esirtki qylmysyna qarsy kúres basqarmasynyń qyzmetkerleri "Dopıng" operatsııasy barysynda bir keliden astam marıhýana tárkiledi, dep habarlaıdy QazAqparat vedomstvonyń baspasóz qyzmetine silteme jasap.
"Polıtseıler osy aptada "Dopıng" jedel aldyn alý is-sharasyn ótkizdi. Shara barysynda bir keliden astam esirtki zattaryn tárkiledi. Sonymen qatar esirtkiniń zańsyz aınalymyna baılanysty 5 qylmysty anyqtady", - delingen polıtsııa departamentiniń baspasóz habarlamasynda.
Tártip saqshylary Qostanaı qalasyndaǵy "Emshan" saýda úıiniń janynda 37 jastaǵy er adam ustady, onyń sómkesinen salmaǵy 1 keli 165 gramm bolatyn keptirilgen marıhýana tabyldy.
Polıtsııa podpolkovnıgi Qaırat Taşanovtyń aıtýynsha, kúdikti buryn esirtkiniń zańsyz aınalymyna baılanysty quqyq buzýshylyqtar úshin tartylǵan. Kúdiktige qatysty kúzetpen ustaý bultartpaý sharasy sanktsııalandy.
Jalpy, jyl basynan beri esirtki qylmysyna qarsy kúres basqarmasy 121 quqyq buzýshylyqty tirkedi. Zańsyz aınalymnan 3 keliden astam esirtki zattary tárkilendi.
