Bir qamshymdy jylqy berip satyp aldy – aqtóbelik sheber
AQTÓBE. QazAqparat – Ata kásipti qolǵa alǵan sharýa Bátıhan Taýmanov qamshy jasaıdy. Sheber baǵaly buıymǵa tapsyrys berýshi adamdardyń artyp kele jatqanyn aıtty, dep habarlaıdy QazAqparat tilshisi.
Muǵaljar aýdanynyń Taldysaı aýylynda tórt túlik baǵyp otyrǵan kásipker ulttyq qolóner sheberi atanǵan. Aýylda qamshy órip, jasaıtyndar neken-saıaq. Sondyqtan bolar Bátıhan Taýmanovty tanıtyndar onyń sheberligine tánti bolyp, jıi tapsyrys beredi.
«Qamshy órýdi ákemiz úıretti. Balalarymdy janyma alyp, olardy da qolónerge baýlydym. Qamshyny dostarymyzǵa syılaımyz. Shynymdy aıtsam, bizdiń aýylda qamshy jasaıtyn adam joq. Suranys kóp, bizdiń ýaqytymyz az. Bir joly bir adam jylqy berip, bir qamshyny satyp aldy. Kásipkerler de qalap alady», - dedi sharýa Bátıhan Taýmanov. Sharýanyń aıtýynsha, atadan balaǵa mıras bolǵan qamshy, shybyrtqy otbasylyq jádigerge aınalǵan. Qaıysty Bátıhan Taýmanovtyń anasy daıyndap beredi. Jasy 80-nen asqan keıýana áli de qaıratty.
«Qara bıdaıdan bylamyq jasap, bóshkege quıamyz. Bylamyq ashıdy. Túıeniń terisin ashymyqqa salyp, 10-15 kún jyly jerde ustaımyz. Teri túgel batýy tıis. Anda-sanda aralastyryp qoıamyz. Keıin teri aǵarady. Aıazdy kúni jyly sýǵa shaıyp, dalaǵa jaıyp tastaımyz. Bir aptada aıazǵa qatyp qalady. Balalar ýqalaıdy, ıkemge keltirip ıleıdi, taspalap tiledi. Sóıtip qamshy óredi. Qaıys daıyndaý ádisin kelinime úırettim», - dedi Zoıa Taýmanova.
