Bir ǵasyrdan keıin tabylǵan keme
NUR-SULTAN. QazAqparat - Tájirıbeli polıarlyq fotograf Ester Horvat taıaýda ǵana Antarktıda jaǵalaýynan tabylǵan, muz qursaýynan 2 mıl tómende jatqan kemeni sýretke túsirgen.
Nationalgeographic.kz Ester Horvattyń tuńǵıyqtan túsirgen sol tarıhı sýretterin jáne nationalgeographic.com avtory Sımon Ýorraldyń (Simon Worral) keme týraly materıalynan qysqasha maǵlumat usyndy, dep habarlaıdy QazAqparat Nationalgeographic.kz saıtyna silteme jasap.
Aǵylshyn-ırlandyq zertteýshi Ernest Sheklton bastaǵan ekspedıtsııa mingen «Endurance» atty keme saparǵa 1914 jyly jeloqsanda Ońtústik Georgııadan shyqqan. Maqsaty – Ońtústik polıýske jetýdi kózdegen Sheklton bastaǵan zertteýshilerdi Antarktıda jaǵalaýyna jetkizý. Alaıda keme 1915 jyly qarashada Ýeddel teńizinde muz qursaýyna túsip, kúıregen. Keme batyp bara jatqanda muzǵa shyǵyp úlgergen ekspedıtsııanyń 28 múshesiniń áýpirimdep júrip aman qalǵany óz aldyna bir hıkaıa.
Bir qyzyǵy, keme batqan tus shamamen belgili bolǵanymen, ony izdeý jumystary nátıje bermegen edi. Endi mine, 1 ǵasyrdan astam ýaqyt ótkende Endurance22 ekspedıtsııasy ǵasyr jumbaǵyna aınalǵan kemeni Antarktıdanyń tusynan, Ýeddell teńiziniń túbinen taýyp otyr. Kemeniń alǵashqy keskinderi 5 naýryzda avtonomdy súńgýir apparaty arqyly 2 mıl shamasyndaǵy tereńdikten anyqtalǵan.
Kemeniń Endurance ekendigine eshqandaı kúmán joq, óıtkeni óte tómen temperatýra, otteginiń azdyǵy jáne kún sáýlesiniń joqtyǵy onyń jaqsy saqtalýyna septigin tıgizgen. Fotoda onyń ataýy da anyq kórinip tur. Ǵalymdar kemeniń batqan orny belgili bola tura, uzaq ýaqyt boıy tabylmaýynyń sebebi onyń qursaýǵa túskennen keıin de muzdyń aǵysymen bastapqy ornynan jyljyp ketkendiginen deıdi.
