«Bir el - bir taǵdyr» qaǵıdatyn Qazaqstan halqynyń 93,8 paıyzy qoldaıdy

ASTANA. QazAqparat - Elordada «N.Nazarbaevtyń qoǵamdyq kelisim men ulttyq birliktiń qazaqstandyq modeli: Azııadaǵy ózara is-qımyl jáne senim sharalary keńesi keńistigindegi tájirıbesi» atty AÓSShK Ulttyq mádenı ortalyqtarynyń halyqaralyq forýmy ótýde.

«Bul forým bizdiń elimizde keń aýqymda atalyp ótetin Astana kúni merekesi qarsańynda ótkizilip otyrǵany erekshe maǵyna beredi. Óıtkeni bul mereke táýelsiz Qazaqstannyń órkendeýiniń, halqynyń ál-aýqatynyń artýynyń, óz damýynda jańa bıikterdi baǵyndyrýynyń erekshe kórsetkishindeı. Biz 20 jyldan astam ýaqyt Elbasy Nursultan Ábishuly jarııa etip, tarıhqa «qazaqstandyq jol» degen ataýmen engen beıbitshilik pen kelisim jolymen júrip kelemiz», - dedi jıyndy ashqan Qazaqstan halqy Assambleıasy Tóraǵasynyń orynbasary Eraly Toǵjanov.

Onyń atap ótýinshe, Qazaqstan halqy Assambleıasy tarapynan halyqty uıystyrýdyń negizgi prıntsıpi retinde «bir el, bir taǵdyr», «tegi basqa, teńdigi bir», «ulttyq rýh» sııaqty qaǵıdattar belgilengen. Búgingi tańda bul jumys óz nátıjesin de berýde.

«Bir el - bir taǵdyr» qaǵıdatyn halyqtyń 93,8 paıyzy qoldap otyr. Búgingi tańda Qazaqstan azamattarynyń 95 paıyzy «birtutas Qazaqstan halqynyń ókilimiz», deıdi. Bul Qazaqstannyń eń nátıjeli jeńisi dep aıtsaq, artyq bolmaıdy dep oılaımyn», - dedi QHA Tóraǵasynyń orynbasary.