«Bir el - bir kitap» jalpyhalyqtyq aktsııasy aıasynda bıyl dúıim jurt J. Moldaǵalıevtiń «Men qazaqpyn» poemasyn oqıdy
STANA. Mamyrdyń 21-i. QazAqparat /Jasulan Amanbaıuly/ - Qazaqstanda «Bir el - bir kitap» jobasynyń aıasynda Juban Moldaǵalıevtiń «Men qazaqpyn» poemasy oqýǵa tańdaldy.
Búgin bul týraly Astanada QR Ulttyq akademııalyq kitaphanasynda ótken baspasóz máslıhatynda málimdeldi, dep habarlaıdy QazAqparat.
Ótken ǵasyrdyń 70-shi jyldary jaryq kórgen týyndy qazaq ultynyń ózi týraly poemalyq jarııalaýy boldy. QazKSRO jáne KSRO memlekettik syılyqtarynyń ıegeri J. Moldaǵalıevtiń «Men qazaqpyn» poemasy búgingi kúni de óziniń ózektiligin joǵaltpaı, halyqtyń rýhyn asqaqtatyp tur, deıdi uıymdastyrýshylar.
Aktsııany ótkizetin negizgi ortalyq - kitaphanalar. Osy joǵaryda atalǵan «Bir el-bir kitap» aktsııasyna oraı, barlyq kitaphanalar men oqý oryndarynda, mektepterde kitap kórmeleri, ádebı keshter, zertteýshiler men ádebıettanýshylarmen kezdesýler uıymdastyrylyp, osy shyǵarmany nasıhattaý boıynsha kitap oqýshylar konferentsııasy, ashyq sabaqtar ótedi.
Kitaphananyń ǵylymı-saraptamalyq ortalyǵynyń qyzmetkeri Alla Vangıvatovanyń aıtýynsha, aktsııanyń negizinde Qazaqstanda 700-ge tarta is-shara uıymdastyrý belgilengen.
«Úsh jyl qatarynan ótkizilip kele jatqan shara oqyrmandar arasynda úlken tanymaldylyqqa ıe boldy. Bul ádis - ulttyq ádebıetti nasıhattaýdyń eń tıimdi joly ekendigine kózimiz jetti», dep atap kórsetti A. Vangıvatova.
Aktsııany qoldaǵandardyń ishinde Farıza Ońǵarsynova, Ákim Tarazı jáne Murat Áýezov syndy aqyn-jazýshylar bar.
