«Bir el - bir kitap» aktsııasy F.Ońǵarsynovanyń «Daýa» kitabyn tańdady
ASTANA. 14 naýryz. QazAqparat - Bıylǵy «Bir el - bir kitap» aktsııasy aıasynda Farıza Ońǵarsynovanyń «Daýa» kitaby oqylady. Bul týraly búgin Astanadaǵy Ultyq akademııalyq kitaphanasynda ótken baspasóz máslıhatynda málim boldy.
Aıta keteıik, ótken aıda 2013 jyly halyq jappaı oqıtyn kitapty tańdaý úshin «Bir el - bir kitap» aktsııasy uıymdastyrý komıtetiniń otyrysy bolyp ótti. Májilis qatysýshylaryna QR Ulttyq akademııalyq kitaphanasy, Nazarbaev ortalyǵynyń kitaphanasy, Oblystyq ámbebap kitaphanalar, Astana qalasynyń Ortalyqtandyrylǵan kitaphanalar júıesi, S.Begalın atyndaǵy Memlekettik balalar kitaphanasy, Jambyl atyndaǵy Memlekettik jasóspirimder kitaphanasy, Zaǵıp jáne nashar kóretin azamattarǵa arnalǵan Respýblıkalyq kitaphanasy júrgizgen saýalnama qorytyndysy boıynsha iriktelgen avtorlar tizimi usynyldy.
Tizimge Ǵabıt Músirepovtiń «Ulpan» romany, Sáken Seıfýllın poezııasy, Mirjaqyp Dýlatovtyń «Baqytsyz Jamal» romany, Farıza Ońǵarsynovanyń óleńderi, Muqaǵalı Maqataevtyń lırıkasy, Saıyn Muratbekovtiń «Basynda Úshqaranyń...» atty prozalyq shyǵarmalary, Sáken Júnisovtiń «Aqan seri» romany, Sattar Erýbaevtyń «Meniń qurdastarym» romany, Іlııas Jansúgirovtyń «Qulager» poemasy, Ábdijámil Nurpeıisovtiń «Qan men ter» trılogııasy engen edi. Talqylaý barysynda qazaq ádebıetiniń klassıkalyq shyǵarmasy retinde oqylýǵa laıyq osynaý árbir shyǵarmanyń qundylyqtary týraly aıtyldy. Alaıda uıymdastyrý komıteti músheleriniń kópshiligi óz daýystaryn Qazaqstannyń halyq jazýshysy, Memlekettik syılyqtyń laýreaty Farıza Ońǵarsynovanyń poezııasy úshin berdi. Aktsııanyń kitaby retinde aqynnyń «Daýa» atty lırıkalyq jyr kitaby usynyldy.
Búginde Farıza Ońǵarsynova Qazaqstannyń eń kóp oqylatyn avtory bolyp sanalady. Onyń shyǵarmashylyǵynyń negizgi taqyryptary - súıispenshilik pen jek kórýshilik, erlik pen qorqaqtyq, jaqsylyq pen jamandyq. Óziniń kóptegen óleńderin aqyn týǵan aýylyna, jerlesterine jáne búkil qazaqstandyqtarǵa arnady. Farıza Ońǵarsynovanyń shyǵarmalaryna áleýmettik pen azamattyq tán, aqyn jyrlary otansúıgishtik rýhty oıatyp, týǵan halqyn súıýge, qurmetteýge, onyń dástúrleri men mádenıetin qasterleýge shaqyrady. Farıza Ońǵarsynova áli kúnge qazaqstandyq poezııanyń damýyna óz úlesin qosýda: ol «Tumar» atty respýblıkalyq-kórkem jýrnaldyń bas redaktory bolyp tabylady, sonymen qatar jas talantty ádebıetshilerdi qoldaıdy.
Jyl boıyna Astanadaǵy QR UAK-synda, Almatydaǵy QR Ulttyq kitaphanasynda, oblystyq, aýdandyq jáne aýyldyq kitaphanalarda, ártúrli mekemelerdiń kitaphanalarynda Farıza Ońǵarsynovanyń shyǵarmashylyǵyna arnalǵan is-sharalar ótetin bolady. Aktsııaǵa jyl saıyn bilim berý mekemeleri, sondaı-aq áskerı bólimder qatysady.
