Bir dollar 431 teńge: Ulttyq bank aıyrbas baǵamyna túsinik berdi
NUR-SULTAN. QazAqparat – Ulttyq bank tóraǵasynyń orynbasary Álııa Moldabekova teńgeniń aıyrbas baǵamyna qatysty jaǵdaıdy túsindirdi, dep habarlaıdy QazAqparat tilshisi.
Teńgeniń AQSh dollaryna shaqqandaǵy baǵamy 30 qyrkúıektegi saýda-sattyqtyń ashylýynda bir dollar úshin 431 teńge belgisinen asty jáne aldyńǵy kúnniń jabylýymen salystyrǵanda 0,4%-ǵa álsiredi.
«Munaı baǵasynyń quldyraýy ulttyq valıýtany álsiretti jáne naryqtyń budan bylaıǵy perspektıvalary men kómirsýtekterge suranysqa qaýip tóndiredi.
Koronavırýstyq ınfektsııamen aýyrý jaǵdaılarynyń ulǵaıýy aıasynda álemde otynǵa ornyqty suranystyń uzaq ýaqyt boıy qalpyna kelý jáne álemdik ekonomıkanyń ósý táýekelderi kúsheıdi. Kóptegen ekonomıster men naryq oıynshylarynyń kútýleri boıynsha munaıdy tutynýdyń aıtarlyqtaı ósýi keıingi 1,5-2 jylda ǵana oryn almaq. Sonymen qatar, Lıvııada shıkizat óndirýdiń áleýetti qalpyna keltirilýi munaı baǵasyn belgileýge qysym kórsetti»,- dedi Álııa Moldabekova.
Nátıjesinde 29 qyrkúıekte Brent surypty munaı barreliniń quny $42,43 dollardan $41,03 dollarǵa deıin nemese 3,3%-ǵa, al WTI surypty munaı barreliniń quny $40,6 dollardan $39,29 dollarǵa nemese 3,2%-ǵa tómendep, $40 dollarǵa jetti.
Ulttyq bank baspasóz qyzmetiniń habarlaýynsha, Brent $40,54 dollar deńgeıinde saýdalanady, bul aıdyń basyndaǵy deńgeıden 10,5%-ǵa tómen. Osy kezeńde teńge baǵamy 431,64-ke deıin 2,7%-ǵa álsiredi.
Jalpy alǵanda, álemdik qarjy naryǵynda qubylmalylyqtyń ósýi jáne jahandyq «risk-off» baıqalady, bul damýshy naryqtar valıýtalarynyń teris serpinine áser etedi. Aıdyń basynan bastap túrik lırasy 6,7%-ǵa, Brazılııa realy men Meksıka pesosy 2,6%-ǵa qunsyzdandy. Reseı rýbli qyrkúıek aıynyń basynan beri 6,6%-ǵa aıtarlyqtaı tómendedi.
29 qyrkúıekte Reseı rýbli eń tómengi kórsetkish 79,97-ge jetti. Rýbl baǵamynyń álsireýi geosaıası táýekelderdiń ósýine jáne EO sanktsııalyq tizimderiniń keńeıý yqtımaldyǵy týraly habarlarǵa baılanysty boldy.