«Bir beldeý, bir jol» strategııasy Jibek joly boıyndaǵy elder baǵdarlamasymen úndesip jatyr
BEIJІŃ. QazAqparat - «Bir beldeý, bir jol» atty strategııa aıasynda halyqaralyq yntymaqtastyq boıynsha joǵary deńgeıdegi forýmnyń ashylýynda QHR Tóraǵasy Sı Tszınpın sóılegen sózinde Qazaqstandy úsh ret eske aldy, dep habarlady Qytaıdaǵy «QazAqparat» HAA menshikti tilshisi.
Uly Jibek joly tarıhyna toqtalyp ótkennen keıin onyń mańyndaǵy negizgi qalalardyń biri retinde Almaty ataldy, qytaı kóshbasshysy «Bir beldeý, bir jol» bastamasyna toqtaldy.
«2013 jyly kúzde Qazaqstanda jáne Indonezııada «Jibek joly ekonomıkalyq beldeýi» men «21-shi ǵasyrdaǵy Teńiz Jibek jolyn» birlesip qalyptastyrý boıynsha kóterilgen bastamalar «Bir beldeý, bir jol» biryńaı bastamaǵa biriktirildi», - dedi ol.
Onyń aıtýynsha, ótken 4 jylda 100-den astam memleket pen halyqaralyq uıymdar BBBJ-ny qoldap, qatysýǵa qosyldy. BUU Bas Assambleıasy men Qaýipsizdik Keńesiniń mańyzdy sheshiminde osy bastamaǵa silteme de bar.
«Biz saıasatty kórshi memlekettermen úılestiretin boldyq, olardyń qatarynda Reseı, Eýropalyq ekonomıkalyq odaq, Ońtústik-Shyǵys Azııa memleketteri qaýymdastyǵynyń ózara táýeldilik keshendi jospary, Qazaqstannyń «Nurly jol» baǵdarlamasy, Túrkııanyń «Ortasha dáliz» bastamasy, Mońǵolııanyń «Damý joly», vetnamdyq «Eki dáliz jáne bir sheńber» baǵdarlamasy, Brıtanııanyń «Soltústik ekonomıkalyq ortalyǵy» jáne taǵy basqa elderdiń damý baǵdarlamalary», - dedi Tszınpın.
Sońǵy tórt jylda atqarylǵan jumys nátıjeleri jaıly baıandaǵan QHR Tóraǵasy Qazaqstanǵa taǵy bir ret toqtaldy.
«Osy tórt jylda biz saýda-sattyqtyń óskenin kórdik. Qytaı saýda, ınvestıtsııa jáne bıznes-ortalaryn yntalandyrý maqsatynda basqa da memlekettermen jumys istedi. Meniń bilýimshe, Qazaqstan jáne basqa da Ortalyq Azııa elderinen Qytaıǵa eksporttalatyn aýyl sharýashylyǵy ónimderiniń keden arqyly ótýi 90 paıyzǵa qysqartylǵan», - dedi memleket basshysy.
29 memleket jáne 3 halyqaralyq uıymnyń (BUU, Dúnıejúzilik bank, Halyqaralyq valıýta qory) qatysýymen ótip jatqan forýmǵa Qazaqstan Respýblıkasynyń Prezıdenti Nursultan Nazarbaev qatysyp jatqandyǵyn esterińizge salamyz.
