Bir beldeý – bir jol: Prezıdent qos eldiń tabysty yntymaqtastyǵyn atap ótti

SIANЬ. QazAqparat – Prezıdent Qasym-Jomart Toqaev memlekettik sapary barysynda Sı Tszınpınmen júrgizilgen kelissóz kezinde qos eldiń «Bir beldeý – bir jol» aıasyndaǵy tabysty yntymaqtastyǵyn atap ótti, dep habarlaıdy QazAqparat Aqordaǵa silteme jasap.

«Ekonomıkalyq áleýettiń júzege asyrylýy kóbinese kólik-tranzıt salasyna baılanysty. Bul jerde Sizdiń aýqymy jaǵynan biregeı «Bir beldeý – bir jol» bastamańyzdyń aıasyndaǵy tabysty yntymaqtastyǵymyzdy erekshe atap ótkim keledi. Osy jyldar aralyǵynda «Bir beldeý – bir jol» jobasyn birlesip júzege asyrýda eleýli nátıjege qol jetkizildi.

Erteń Sıan qalasynyń qurǵaq portynda logıstıka ortalyǵy irgetasynyń onlaın rejımde qalanýy bizdiń kólik-logıstıka salasyndaǵy baılanystarymyzdyń taǵy bir belesi bolmaq.

Kólik dálizderin ártaraptandyrý aıasynda Transkaspıı halyqaralyq kólik baǵdarynyń (THKB) áleýetin belsendi túrde paıdalanýdy usynamyn», - dedi Qasym-Jomart Toqaev.