Bir baǵyttaǵy kóshelerde jol apaty azaıǵan - Almaty polıtsııasy

ALMATY. QazAqparat - Almatyda Jergilikti polıtsııa qyzmeti bir baǵytty kóshelerge qatysty arnaıy taldaý júrgizdi, dep habarlaıdy QazAqparat tilshisi. 

Statıstıkalyq derekterge sáıkes, 2017 jyly bir baǵyttyq qozǵalys engizilmeı turǵanda Qurmanǵazy kóshesinde - 49, Shevchenko kóshesinde - 53 jol apaty bolǵan.

Al bıyl, bir baǵyttyq qozǵalys engizilgeli beri Qurmanǵazy kóshesinde - 20, Shevchenko kóshesinde - 13 jol apaty boldy.

«Qazirgi tańda bul kóshelerde jol qozǵalysy turaqty. Barlyq baǵyttaǵy kólikter jol apatynsyz, keptelissiz júrip jatyr. Osy ýaqyt aralyǵynda atalǵan kóshelerdiń boıyndaǵy avtoturaqtardy rettestirip úlgerdik. Polıtsııa qyzmetkerleri júrgizgen reıdter nátıjesinde atojúrgizýshiler de bul ózgeriske tez beıimdelip ketti», - dedi qalalyq ІІD resmı ókili Saltanat Ázirbek.

Qala ákimdigi kishi kólik aınalma shekarasyndaǵy Jambyl, Qarasaı batyr, Qabanbaı batyr, Bógenbaı batyr, Gogol, Muratbaev jáne Sháripov kóshelerine bir baǵyttyq kólik qozǵalysyn engizbek.

Bul ózgerister kólikten keletin qaýipti 50% azaıtýǵa, apatty jaǵdaılardy qysqartýǵa, negizgi magıstraldy kóshelerde kólik ótkizý qabiletin arttyrýǵa yqpal etedi.