Bir aıdan artyq ýaqyt jumysqa sebepsiz kelmegen azamatty zań boıynsha jumystan shyǵarady - B.Nurymbetov

ASTANA. QazAqparat - Búgin Májiliste jańa redaktsııadaǵy Eńbek kodeksin tanystyra otyryp, Densaýlyq saqtaý jáne áleýmettik damý vıtse-mınıstri Birjan Nurymbetov jumysyna salǵyrt qaraıtyn azamattarǵa qatysty zań normasyn túsindirdi.

«Elimizde rasymen qyzmetker jumysyna aılap kelmeı qoıatyn jaıttar kezdesken. Ol adam aýyrmaı-syrqamaı úıinde jata beredi, tek jumysyna barmaıdy. Burynǵy kodeks boıynsha jumys berýshi ony jumystan shyǵara almaıtyn, sebebi ol adamnan túsinikteme alýy kerek. Qyzmetker túsinikteme jazýdan bas tartsa, ony bas tartý aktisi retinde tirkeý kerek. Sondyqtan, biz jańa qujatta ol normany alyp tastadyq»,-dep túsinýdirdi vıtse-mınıstr.

B.Nurymbetov túsindirip ótkendeı, jańa kodekstiń normalaryna saı, eger óndiris kólemi azaıyp, ekonomıkalyq shyǵyn týyndasa jumys berýshi jumysshylardy qysqarta alady.

«Jańa kodeks boıynsha zeınet jasy tolǵan azamattardy jumystan shyǵaryp, qysqartýǵa bolady»,-dep atap ótti B.Nurymbetov.

Vıtse-mınıstr atap ótkendeı, zeınetker zeınetke shyqqannan keıin de jumys isteıtin bolsa, ol jylyna bir ret jumys berýshimen eńbek kelisimshartyn jańartyp otyrýy kerek.