Bir aıda Qazaqstanda 12 adam ıis tıip ýlanyp, kóz jumǵan - TJK
ASTANA. QazAqparat - 22 qarasha men 22 jeltoqsan aralaǵynda el boıynsha 45 adam ıis tıip, ýlanǵan. Onyń ishinde 12 adam kóz jumsa, 84 adam aýrýhanaǵa túsken.
QR ІІM Tótenshe jaǵdaılar komıtetiniń resmı ókili Rýslan Imanqulov habarlaǵandaı, jazataıym oqıǵalardyń kóbi azamattardyń nemquraıdylyǵy saldarynan bolady eken.
«Halyq nazaryna jetkizgim keletin taǵy bir másele - ıis tıip, gazben ýlaný máselesi. Qysta keıbir azamattardyń peshpen jylytý kezinde qaýipsizdik qaǵıdalaryn saqtamaıdy. Mysaly, 2015 jyldyń 11 aıynda peshterdi paıdalaný kezinde órt qaýipsizdigi qaǵıdalaryn buzý saldarynan 1321 órt oryn aldy. Ýly gazben ýlaný saldarynan 65 adam kóz jumdy»,-deıdi ol.
Sońǵy bir aıdyń ózinde respýblıka boıynsha 12 adamnyń ajaly osydan bolǵan.
«22 qarasha men 22 jeltoqsan aralyǵynda respýblıka boıynsha ýly gazben ýlanǵan 45 oqıǵa oryn aldy. Osy keleńsiz jaǵdaı saldarynan 12 adam kóz jumdy, 84 adam aýrýhanaǵa tústi. Sondyqtan, jylytý maýsymynda azamattardyń saq bolýyn suraımyz»,-deıdi R.Imanqulov.
