Bir aıda 800 myńǵa jýyq qazaqstandyq JRVI juqtyrǵan

ASTANA. QazAqparat – Bıyl 1 qazannan bastap elimizde 764 247 JRVI jáne 521 tumaýǵa ushyraý jaǵdaıy tirkeldi. Atalǵan derekti Densaýlyq saqtaý mınıstrligi sanıtarııalyq-epıdemıologııalyq baqylaý komıteti juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova keltirdi, dep habarlaıdy QazAqparat tilshisi.

«Elimizde JRVI jáne tumaýdyń taralýyn monıtorıngileý jyl saıyn 1 qazannan bastalyp, kelesi jyldyń 30 sáýirine deıin júrgiziledi. Bıyl epıdemııalyq maýsym bastalǵaly 764 247 JRVI jaǵdaıy tirkeldi. Ótken jyly da kórsetkish osy deńgeıde bolǵan. Al, tumaý boıynsha el kóleminde 521 zerthanalyq turǵydan rastalǵan jaǵdaı tirkeldi. Taralý jaǵynan óńirlerge kelsek, Qyzylorda oblysy – 128, Jetisý oblysy – 84, Aqtóbe oblysy – 69 jaǵdaımen úshtikte tur», - dedi Roza Qojapova Ortalyq kommýnıkatsııalar qyzmeti alańynda ótken baspasóz máslıhatynda.

Densaýlyq saqtaý mınıstrligi ókiliniń aıtýynsha, el kóleminde tumaýdan basqa, oǵan uqsas vırýstar da taralyp jatyr.

«Tumaýǵa uqsas ınfektsııalar boıynsha 1 202 synama tekserildi. Onyń ishinde 254 synama (21,1%) rastaldy. Vırýstarǵa kelsek, rınovırýs – 93, RS vırýs – 77, paragrıpp – 31, koronavırýs – 20, adenovırýs – 17, bokavırýs – 10, metapnevmovırýs – 6», - deıdi ol.

Aıta ketsek, buǵan deıin bir synypta 30 paıyz JRVI jaǵdaıy tirkelse, oqý onlaın formatqa aýystyrylatyny aıtyldy.

Sondaı-aq, atalǵan vedomstvodan habarlaǵandaı, qazaqstandyqtardyń 9,5 paıyzy tumaýǵa qarsy vaktsına salǵyzǵan.