Bir aıda 6 mln teńge: Kóliktik baqylaý qyzmetkerleri qalaı paıda tabady
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi kólikti baqylaý salasyndaǵy jemqorlyq faktilerin jarııalady, dep xabarlaıdy QazAqparat tilshisi.
Agenttik tóraǵasynyń orynbasary Oljas Bektenovtyń aıtýynsha, búginde kóliktik baqylaý salasynda jemqorlyq máselesiniń ýshyǵyp turǵany sonsha, respýblıka boıynsha paramen ustalmaǵan basshylar qalmady.
«Jaqynda Almaty oblysynda biz Ulttyq qaýipsizdik komıtetimen birge qylmystyq topty anyqtadyq. Olar júk kólikterinen aqsha jınap kelgen. Sonda kóliktik baqylaý basshysynyń orynbasary bir aıda taza 6 mıllıon teńge para alyp, ózine qaldyryp otyrǵan. Astanada ondaı jaǵdaılar da boldy. Kóliktik baqylaý qyzmetiniń bir basshysyn ustadyq. Onyń ornyna basqasy keldi. Kelmeı jatyp, bizdiń qyzmetkerlerimizge para usyna bastady. Ony para bergeni úshin quryqtady. Respýblıka boıynsha ondaı jaǵdaılar kóp», - dedi O.Bektenov QR Parlament Senatynda ótken jıynda.
Onyń aıtýynsha, agenttik mamandary QR Investıtsııalar jáne damý mınıstrliginiń jumysyna taldaý jasady. Sonda barlyq zańbuzýshylyqtardyń 90 protsenti kóliktik baqylaý ınspektorlaryna tıesili bolyp shyqty. Biraq quziretti organ tıisti sharalardy qolǵa alyp jatqan joq.
«Osyǵan baılanysty biz mınıstrdiń atyna kólik komıteti tóraǵasynyń jeke jaýapkershiligi týraly usynys xatty joldadyq. Qazirgi kezde atalǵan materıaldar Prezıdent Ákimshiliginde kadrlyq saıasat jónindegi ulttyq komıssııanyń qaraýynda jatyr. Sebebi ol memlekettik qyzmetshilerdiń «A» korpýsyna jatady», - dep atap kórsetti O.Bektenov.
