Bir aıaǵynan aırylǵan fýtbolshynyń armany - paralımpıada chempıony ataný
ASTANA. QazAqparat - 18 jasar Baqtııar búginde «Astana» fýtbol komandasynyń jastar quramasynda oınaýy tıis fýtbolısterdiń biri. Degenmen, taǵdyrdyń jazýymen jas fýtbolshy 17 jasynda aýyr dertke ushyrap, bir aıaǵynan aıyryldy. Búgin Baqtııardyń úılený toıy, mańyzdy kún. Bir aıaǵynyń ornynda protez bolsa da, «toıdyń sońyna deıin barlyq qonaqtarmen birge bolamyn» deıdi jas kúıeý bala. QazAqparat tilshisi ómirdiń synaǵyna qaramastan, ómir súrýge degen qushtarlyǵyn joǵaltpaǵan jas sportshynyń qýanyshyna ortaqtasyp qaıtty.
Kishkentaıynan fýtbolǵa qumartqan Baqtııar Muhambetqalıev óse kele «Astana» komandasynyń jasóspirimder tobynda ala doppen kásibı túrde aınalysa bastaıdy. Mektep qabyrǵasynda júrgende sporttyń barlyq túrinen belsendi bolyp, ásirese fýtbol dese ishken asyn jerge qoıatyn. Biraq, taǵdyrdyń jazýymen osydan bir jarym jyl buryn bozbala oıynnan alǵan jaraqattyń kesirinen aýyr dertke ushyraıdy. Dárigerler «aıaǵynda qaterli isik bar, ota jasaý kerek» degen sheshim qabyldaıdy. Baqtııardyń anasy sol sáttiń uly men otbasy úshin asa aýyr tıgenin aıtady. Abyroı bolǵanda, qaıyrymdy jandar qol ushyn sozyp, ota jasaldy. Biraq ol da ońaıǵa túsken joq, óıtkeni birinshi ota, odan soń ekinshisi, keıin úshinshisi, odan aıaǵy kesildi, sodan keıin ǵana kesilgen aıaǵynyń ornyna temir aıaq salyndy. Jalpy, buǵan deıin de Baqtııardyń qıyn taǵdyry týraly elimizdegi kóptegen BAQ jazǵan, aıtqan bolatyn.
Degenmen, búgin muń keship, ýaıymǵa salynatyn kún emes, búgin - Baqtııardyń úılený toıy. 18 jasar jigittiń súıgen jary men 1,5 jasar Dinmuhammed esimdi uly bar, al úılený toıy Baqtııardyń densaýlyǵyna baılanysty birneshe ret keıinge shegerilgen bolatyn.
«Shynymdy aıtsam, azdap qobaljyp turmyn. Biz bul úılený toıyn uzaq kúttik, sebebi densaýlyǵyma baılanysty birneshe ret keıinge qaldyrýǵa týra keldi. Endi ótkizemiz degen kezde birese maǵan ota jasaýy kerek nemese aıaǵyma protez ornatýy tıis boldy. Onyń ústine, ata-anam da toıdy asyqtyrmaı, áýeli densaýlyqty durystap alýdy jón dep sheshti. Osydan 4 aı buryn aıaǵyma protez ornatty, sodan keıin toıǵa daıyndyqty bastadyq», - deıdi Baqtııar Muhambetqalıev.Jas sportshynyń aıtýynsha, ómirdiń bergen synaǵyn jeńip shyǵyp, búginge kúnge jetýi - ol aldymen ata-anasy, súıgen jary men Dinmuhammed esimdi ulynyń arqasy.
«Men úshin búgin úılený toıy ǵana emes, sonymen qatar alǵys kúni der edim. Óıtkeni, osy kúnge jetýim, búgingi toıdyń bolýy - meniń jaqyndarym men dostarymnyń qoldaýynyń arqasynda. Ásirese, ata-anam, joldasym jáne ulym. Ol kisiler men aýyr jaǵdaıǵa tap bolǵan kúnnen bastap janymda», - deıdi Baqtııar.
«Qýanyshpen qatar qobaljý bar, sebebi úılený toıy - ár adamnyń ómirindegi mańyzdy sáttiń biri. Dál qazirgi ishki sezimimdi sıpattasam - qazir men fýtbol alańyna shyǵatyn sııaqty kúıde turmyn. Mende buryn fýtbol oınar aldynda osyndaı sezim bolatyn. Іshimnen «qalaı bolady eken, nátıjeli oıyn kórsete alam ba» dep myń oılanyp, qobaljıtynmyn, qazir de sol sııaqty tolqýly sezimde turmyn. Fýtbol alańyndaǵydaı toıhanada da meni qanshama adamdar kútip otyr.Búgingi toıda barlyǵy kóńil kóterip, qyzyq ótkenin qalaımyn», -deıdi jas kúıeý jigit.
Baqtııar búginde ala dopqa qyzyǵýshy jasóspirimdermen óz tájirıbesimen bólisip júr. Astanada fýtboldan jas jetkinshekterdiń treneri bolyp jumys isteıdi. Ol fýtboldaǵy oryndalmaı ketken óz armany men maqsatyna tárbıelep jatqan jasóspirimder jetse eken deıdi.
«Aptasyna úsh ret fýtboldan jattyǵý ótedi. Jattyǵý kezinde balalarǵa bar bilgenimdi úıretemin. Meniń armanyma aınalǵan fýtboldy endi shákirtterim myqty meńgerse eken», - deıdi Baqtııar. Jas sportshy óziniń bolashaqtaǵy arman-maqsatymen de bólisti.
«Arman-maqsat jeterlik. Eń basty armanym -paralımpıada oıyndaryna qatysý. Osy jaǵdaıǵa tap bolǵannan beri «ózdigimnen ne isteı alamyn, óz betimshe qandaı jetistikke qol jetkizem» degen suraqtar jıi mazalaıdy. Otbasymmen aqyldasa kele jeke sport túrimen aınalysýdy durys dep sheshtim, naqty aıtqanda sýda júzý. Armanym - sýda júzýden paralımpıdaǵa qatysyp, chempıon ataný. Osy armanyma qol jetkizý jolynda daıyndyqty toıdan keıin bastaımyn», - dedi Bahtııar Muhambetqalıev.
Sonymen qatar, Baqtııar elimizdegi jas jetkinshekter men stýdentterdiń aldynda ómirlik motıvatsııalyq dárister oqyǵysy keledi. Kózdep otyrǵan taǵy bir jospary - ózi jáne otbasy týraly derekti fılm túsirý.
Toı degende, onyń ústine óz balasy úılenip jatqanda qaı ana qobaljymaýshy edi. Mereke qyzyp jatqan sátte Baqtııardyń anasymen de tildesip, qýanyshyna ortaqtasýdy jón kórdik.
«Balamnyń mańdaıyna jazǵan taǵdyrdyń aýyr synaǵyn eshkimniń basyna bermesin deımin. Biz úshin óte aýyr boldy, ásirese alǵashqy jyldary. «Ýaqyt emshi» demekshi, ýaqyt óte kele bári qalypqa túsip jatyr. Men ulymdy maqtan tutamyn, óıtkeni Baqtııarda sol qıyn jaǵdaıǵa tap bolǵan kúnnen bastap eshqandaı ómirden túńilý nemese «men nege osyndaı boldym» degen sekildi qynjylý bolǵan emes. Kerisinshe, ómirge degen qushtarlyǵy arta tústi. Tipti sol jaǵdaıǵa tap bolǵan soń arada 40 kún óte salysymen «mama, men daıyndyǵyma qaıta kirisem» dedi. Jas bolǵanyna qaramastan, synaqqa tótep berýi - ulymnyń erjúrektigi dep oılaımyn. Ómirde alǵa qoıǵan maqsaty kóp. Sondyqtan, men balamnyń óz armandaryna jetetinine senimdimin», - dep tilegimen bólisti Baqtııardyń anasy Gúlnaz Sársenbaeva.
Shańyraq kóterip jatqan jas otaý ıelerine biz de óz atymyzdan ómirdegi bar jaqsy, ıgi tilekterdi tilep, qýanyshty kúnderimen quttyqtadyq.
