Bir aıaǵy joq bıshi jigit tóreshilerdi tebirentti
ASTANA. QazAqparat - TNT telearnasyndaǵy «Tantsy» shoýyna qatysqan Evgenıı Smırnov naǵyz talant eshteńeden de taısalmaıtynyn dáleldedi. Ol sahnaǵa shyqqan kezde shoýdyń ádil qazylary selk ete qaldy, al, ol bıleı bastaǵanda, kózderine jas alyp, jigeri myqty jigittiń ónerine bas ıdi.
Sochı qalasynan kelgen Evgenıı rasymen de ádil qazylar alqasyn ǵana emes, shoý kórermenderiniń barlyǵyn tamsandyrdy. «2001 jyldan beri kásibı bıge den burǵan edim. Tipti, úlken kontsertterde óner kórsetetin arnaıy top ta qurdyq. «Breıkdens» stılin óte qatty jaqsy kóremin jáne kóbinese osy janrda bıleıtin edim. Biraq, ókinishke qaraı, komandamyz qazir tarap ketti. Onyń ústine men biraz ýaqyt komandanyń jumysyna aralasa almaı qaldym. Sebebi... sebebi, 2012 jyly jol apatyna ushyradym. Mototsıkl minip kele jatqan meni kólik soǵyp ketti, jol apatynyń saldarynan bir aıaǵymnan aıyrylyp qaldym...Basynda, ómirim osy jerde bitken shyǵar dep oıladym, biraq, boıymnan kúsh-qýat taýyp, qaıta bıleýdi bastadym. Bir aıaqpen bılep úırený ońaı emes edi...», - deıdi Evgenıı Smırnov.
Evgenıı Smırnovtyń shoýdaǵy serigi - Dasha Smırnova degen kásibı bıshi boldy. Alǵashynda, ádil qazylar alqasy Dasha - Evgenııdiń áıeli dep oılady, alaıda, tekteri birdeı bolǵanymen, Evgenıı men Dashanyń arasynda eshqandaı týystyq qatynas joq eken. Dashanyń aıtýynsha, onyń jary bar, al Jenıanyń súıikti qyzy bar. Qazylar alqasy Evgenııdi shoýdyń kelesi kezeńine ótkizdi. Tipti, «olardyń (aıaq-qoly saý bıshilerdiń) qanshalyqty jalqaý, kishkene jetistiktiń ózine keýde qaǵatyn adam ekenderin dáleldegeni» úshin Jenıaǵa alǵys aıtty.
