Bir aı ishinde «Saryarqa» EEA qatysýshysy bolýǵa múmkindik jasaldy
Ol qazirgi tańda ınvestorlarǵa qoldaý kórsetilip jatqanyn atap ótti.
- Bizdiń EEA-tyń artyqshylyǵy qandaı? Birinshiden, bul aımaqtyń áleýeti - ındýstrıaldy alań, shıkizattyń bolýy, arzan elektr energııasy. Qazir biz árbir EEA qatysýshysyna qajetti energetıkalyq qýattylyqty usynýǵa daıynbyz, - dedi obys ákiminiń orynbasary. - Sonymen birge EEA qatysýshylaryn rásimdeý - bizge ol merzimdi bir aıǵa deıin qysqartýǵa múmkindik týdy. Bul tájirıbe júzinde tekserildi - qatysýshylar ol derekti rastaı alady.
Onyń aıtýynsha, bir aı kóleminde jer telimi berilip, tehnıkalyq sharttar usynylady.
Áleýetti qatysýshylar úshin bılik basyndaǵylar ınvestıtsııalyq taýashalar qurastyrǵan eken.
- Biz barlyq telimder boıynsha úlestirýler daıyndap qoıdyq, qaı jerde qandaı zaýyttar ornalasatynyn belgiledik. Bul rette oblysqa engizýge týra keletin taýarlardyń ımportyna, sonymen qatar turaqty iri kompanııalar shet elden satyp alatyn ónimderge súıendik. Sonymen qatar keleshekte naryq qandaı ónimderdi paıdalanatynyna boljaý jasadyq, - dep málimdedi Almas Aıdarov.
Jasalǵan saraptamalar iri gabarıtti qubyrlar óndirisi, aýylsharýashylyq mashınalaryn jınaý, lıft qurylysy, hımııalyq tyńaıtqyshtar óndirý tetikteri áli jabylmaǵanyn kórsetti. Oblysta qurylys klasteri qurylǵan, alaıda ózimizdiń boıaý-syrlaý materıaldary jetispeıtini baıqalady. Qazir shet elden gıdravlıkalyq jáne kompressorlyq qurylǵylar jetkiziledi, alaıda onyń óndirisin jergilikti jerde de uıymdastyrýǵa bolar edi.
«Saryarqa» EEA aýmaǵynda qazirgi tańda 6 kásiporyn jumys isteıdi, taǵy 6 zaýyt qurylys salasynda.
Jyl sońyna deıin patron zaýytynyń birinshi kezegi iske qosylady dep kútilýde. Qurylysty tolyǵymen aıaqtaý 2018-shi jyly josparlanyp otyr. Jobanyq quny - 22 mlrd teńge. Birinshi kezeńde tapansha oqtary shyǵarylady. Oblys ákiminiń orynbasary málimdegendeı, qajetti jabdyqtar satyp alynǵan, qazirgi tańda iske qosý- retteý jumystary júrgizilýde.
«Saryarqa» EEA QR Prezıdentiniń Jarlyǵymen 2011-shi jyldyń qarashasynda Metallýrgııa jáne Metal óńdeý ındýstrııalyq parkiniń negizinde qurylǵan bolatyn. Onyń qyzmet etý merzimi 2036-shy jyldyń 1-shi jeltoqsanyna deıin dep belgilengen. Aımaq 500 gektardan astam aýmaqqa sozylǵan. EEA qyzmetiniń basym baǵyttary metallýrgııalyq ónimderdi jáne metall zattardy óndirý, elektrondyq jáne optıkalyq ónimder, hımııalyq ónerkásip, qurylys ındýstrııasy dep anyqtalǵan. Infraqurylym da salynǵan: qýattylyǵy 5 100 tekshe metrdi quraıtyn sýmen qamtý júıesi jáne káriz; elektr qýatymen qamtý - 486 MVt; temirjol stantsııasy.
Atap ótken jón, EEA qatysýshylary salyq jáne kedendik jeńildikterdi paıdalanady.