Bir aı ishinde 242 áıel zorlyq-zombylyqqa ushyraǵan - Qyzylorda oblysy
QYZYLORDA. QazAqparat - Jergilikti polıtsııa qyzmeti Áıelderdi zorlyq-zombylyqtan qorǵaý toby qyzmetkerleriniń júrgizgen jumystarynyń nátıjesinde 2017 jyldyń 1 aıynda áıelderge qatysty jasalatyn qylmystar sany ótken jyldyń esepti merzimimen salystyrǵanda 46,8%-ǵa tómendegen. Bul týraly QazAqparat HAA tilshisi oblystyq ІІD-ge silteme jasap habarlady.
Atalǵan quqyq buzýshylyqtardyń týyndaýyna kóp jaǵdaıda otbasyndaǵy urys-keris, nashar qarym-qatynas, erli-zaıyptylardyń arasyndaǵy qyzǵanysh jáne spırttik ishimdikter sebep bolady eken.
Engizilgen jańa ózgerister qazirdiń ózinde turmystyq zorlyq-zombylyqtyń aldyn-alýda oń nátıjesin berýde. Atap aıtqanda, jyl basynan bergi 1 aıda turmystyq ortada zorlyq-zombylyqqa jol bergenderi úshin 242 azamatqa qorǵaý nusqamasy shyǵarylǵan. Otbasyndaǵy áıelderge jasalǵan quqyq buzýshylyqtary úshin 251 azamatqa ákimshilik hattama toltyrylsa, onyń ishinde QR ÁQBtK-niń 73-babymen 54 azamatqa qatysty mamandandyrylǵan ákimshilik sot sheshimderimen eskertý jasalyndy.
Máselen, 2017 jyldyń 20 qańtarynda bir azamatsha zańdy nekedegi kúıeýi balalarynyń kózinshe qol kóterip, balalardyń járdemaqysy men tapqan aqshasyn qorqytyp alyp qoıǵandyǵyn kórsetip, ishki ister organdaryna aryzdanǵan bolatyn. Aryz negizinde kúıeýine qatysty QR Ákimshilik quqyq buzýshylyq týraly kodeksiniń 73-baby boıynsha ákimshilik hattama toltyrylyp, sotqa jiberildi jáne «Turmystyq zorlyq-zombylyq profılaktıkasy týraly» Qazaqstan Respýblıkasy Zańynyń 20-babyna sáıkes qorǵaý nusqamasy belgilendi.
Al, azamatsha óziniń 4 balasymen áıelderge arnalǵan «Qamqorlyq» daǵdarys ortalyǵyna ornalastyryldy.
Otbasyndaǵy zorlyq-zombylyq qurbandarynyń jartysy moraldyq turǵydaǵy mineýden qorqyp, quqyq qorǵaý organdaryna kóp jaǵdaıda shaǵymdanbaıdy. Osyǵan baılanysty, zorlyq-zombylyqqa dýshar bolǵan áıelderge kómek kórsetý maqsatynda halyq kóp shoǵyrlanatyn oryndarda aqparattyq-nasıhattyq sharalar júrgizilip, áleýmettik turǵydan az qamtylǵan otbasylardy aralaý, moraldyq-psıhologııalyq jaǵynan qoldaý kórsetý jumystary júrgizilýde.
