Bir avtobýs balany qutqaryp qalǵan polıtseıdiń tuıaǵy ákesiniń erligin qaıtalady
PAVLODAR. QazAqparat - Pavlodarda adamdardy órtten qutqarǵan polıtsııanyń eki qyzmetkeri marapatqa usynyldy.
«102» nómiriniń operatoryna Pavlodardaǵy turǵyn úılerdiń birinen órt shyqqany týraly habar túskende, oqıǵa ornyna polıtseıler - aǵa serjant Rınat Káribaev pen kishi serjant Baǵdat Baıysov shuǵyl jetti.
Olar shaqyrtý ornyna jetken kezde úıdiń kireberisin basqan qoıý tútindi jáne árli-berli sabylǵan adamdardy kórgen. Eresekter men balalar tútinge tunshyǵyp jatty. Jaǵdaıdy baǵamdaǵan polıtseıler turǵyndardy qaýipsiz jerge óz kúshterimen kóshirýge sheshim qabyldaıdy.
Tútinge tunshyqqan turǵyndardyń biri balkonǵa júgirip shyǵyp jatsa, biri terezeni urǵylap, kómekke shaqyryp turdy. Iis tıip, eseńgirep jatqandar, qorqynysh pen sharasyzdyqtan túpki bólmege tyǵylyp qalǵandar da boldy, dep habarlady Pavlodar oblystyq ІІD baspasóz qyzmetinen.
Іshki ister organdaryna jumysqa turǵanyna bir jyl bolmaǵan Baǵdat Baıysovtyń ákesi kezinde bir avtobýs balany qutqaryp, «Erligi úshin» nagradasymen marapattalǵan bolatyn. Adamdardy órtten aman alyp shyqqan Baǵdat ta marapatqa usynylady.
Rınat Káribaev 2012 jyldan beri polıtsııada qyzmet etýde. Rınat Káribaev pen Baǵdat Baıysovtyń jedel jáne kásibı jumysynyń arqasynda birneshe adam ajaldan aman qaldy.
