Bir aýyz jyly sóz de dertke daýa – aqmolalyq medbıke Gúlnár Rahymova

KÓKShETAÝ. QazAqparat – Dert meńdep, daýa izdegen kez kelgen adamnyń dárigerge júginetini anyq. Osy rette, aýrý azabyn tartqan sátte ajalǵa arasha bolatyn aq halatty jandardyń eńbegi ólsheýsiz. Sonyń biri – bizdiń búgingi keıipkerimiz Baıan Qýanyshbaıqyzy Kókshetaý qalalyq emhanasynda medbıke bolyp qyzmet atqarady. QazAqparat tilshisi osy bir aıaýly janmen jaqynyraq tanysyp, sózge tartqan edi.

– Áńgimemizdiń álqısasyn qaıda bilim aldyńyz, sodan bastasaq.

– Osydan 30 jyl buryn Kókshetaý medıtsınalyq ýchılışesin támámdadym. Ol kezde nebári 18 jasta edim. Ómirdiń ystyq-sýyǵynyń ne ekenin áli bilmeıtinmin. Shyny kerek, bastapqyda medbıke bolýdan qoryqtym, óz ózime degen senim bolmady. Dertine daýa izdep kelgen neshe túrli naýqastardy kórgende medıtsına qyzmetkerine júktelip otyrǵan jaýapkershiliktiń óte úlken ekenin sezindim. Aǵa býynnyń jas mamandarǵa degen iltıpaty men qamqorlyǵynyń arqasynda ózime degen senimdilik paıda bola bastady. Keıin ýaqyt óte kele, mamandyq tańdaýda qatelespegenimdi túsindim.

– Qazirgi atqaryp júrgen qyzmetińizdiń qyr-syry jaıly birer aýyz aıtsańyz?

– Qazirgi kezde Kókshetaý qalalyq emhanasynyń №226 ýchaskesinde medbıke bolyp eńbek etemin. Osy mekemede jumys istep otyrǵanyma biraz jyldyń júzi boldy. Ýchaskede 1800 adam tirkelgen bolsa, kún saıyn 16-20 adamǵa medıtsınalyq kómek kórsetýge týra keledi. Al, qalǵan ýaqytta júrip-turýy qıyn qart adamdar men jańa týǵan sábılerdiń úılerine baryp, jaǵdaılaryn bilemin. Bul jumystyń óte kúrdeli ekendigin onymen betpe-bet kelgen adamdar ǵana jaqsy biledi. COVID-19 órship turǵan kezde jumys isteý medıtsına qyzmetkerleri úshin óte qıyn boldy. Qazirgi jaǵdaı sál turaqtalyp, qalypty ómirge aýysa bastadyq.

– Búgingi kúnniń medbıkesi qandaı bolýy tıis, ózińizden keıin jas mamandarǵa aıtar aqyl-keńesińiz.

– Qazir bizdiń aýrýhanaǵa oqýyn endi aıaqtaǵan jas mamandar kelýde. Sol jastardy kórip, keshegi ózimniń 18 jastaǵy kezimdi elestetemin, olarǵa analyq, apalyq aqylymdy aıtýdy paryzy sanaımyn. Jaqsy medbıke bolý úshin uqyptylyq, jaýapkershilik degen qasıetter azdyq etedi. Ol úshin kúndelikti tájirıbe kerek. Bizder tek qana eresektermen ǵana emes, sonymen qatar, kishkentaı balalarmen de jumys isteımiz. Eresek adam qaı jeriniń aýyryp turǵanyn aıta alsa, balalar aýyratyn jerin aıta almaıdy. ıAǵnı, mundaıda medbıke eń birinshiden jaqsy psıholog bolýy tıis. Qazaqta «Jaqsy sóz – jan semirtedi» degen ataly sóz bar emes pe. Medbıkeniń jyly, shýaqty sózderi naýqastyń janyna myńda bir em. «Ýaıymdamańyz, jazylyp ketesiz, dertińizdiń beti beri qarady, bári jaqsy bolady» - degen sózder, aýyryp jatqan janǵa úmit syılap, óziniń de dertimen kúresýine septigin tıgizedi.

– Áńgimeńizge rahmet!