Bir aýyldyń eki turǵyny karantınde toı jasaǵan

ATYRAÝ. QazAqparat –Atyraý oblysynda karantın talabyn buzǵan kásipkerler men úılený toılaryn jasaǵan turǵyndar anyqtaldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetine súıensek, 5 shildeden beri karantındik shekteý talabyn buzǵan 1596 derek tirkelgen.

«Atyraý qalasy men jeti aýdanda ótkizilgen reıdter kezinde azyq-túlik dúkenderi, dámhanalar, kólik jýý jáne jóndeý ortalyǵy, tegershik jóndeý sheberhanalary, qyzmetine ýaqytsha tyıym salynǵan, shektelgen nysandar tekserildi. Moblıldi toptar 900-den astam zań buzýshylyqty anyqtady. Máselen, 1-12 tamyz aralyǵynda karantın rejımin buzǵan 359 fakti tirkelip otyr. Onyń ishinde sanıtarlyq talaptardy saqtamaǵan 21 derek, sondaı-aq, shekteýlerge qaramastan jumys istegen 43 dúken men 2 saýna, 2 kólik jýý ortalyǵy bar.

Sondaı-aq, otbasylyq is-sharalar ótkizýdiń 8 deregi anyqtaldy. Qyzylqoǵa aýdanyndaǵy Saǵyz aýylynyń 2 turǵyny árqaısysy 40-50-den astam adam shaqyryp, úılený toıyn ótkizgen», - dedi oblystyq Polıtsııa departamentiniń bastyǵy Qamza Úmbetqalıev.

Qazir anyqtalǵan barlyq derekke qatysty jınaqtalǵan is-qujattar ákimshilik jaýapkershilikke tartý úshin Atyraý qalalyq Taýarlar men qyzmetterdiń sapasy men qaýipsizdigin baqylaý basqarmasyna joldandy.

Eske sala ketelik, buǵan deıin Atyraý oblysynda karantın rejımi 1 aıda 1378 ret buzylǵanyn habarlaǵan edik.