Bir áýlettiń 11 adamy sýǵa ketti: Marqumdardyń eń úlkeni 40 jasta, eń kishisi 6-da bolǵan
Túrkistan oblysy Tótenshe jaǵdaılar departamenti sýǵa batyp ketken úsh adamdy izdeý jumystarynyń sýretterin jarııalady. Onda qutqarýshylardyń sý astynda jáne jaǵalaýlarda izdeý jumystaryn toqtaýsyz júrgizip jatqanyn kórýge bolady. Qaıyqqa minip, sý ortasyndaǵy qıyndyqtarǵa qaramaı óz mindetterin úlken jaýapkershilikpen atqaryp jatyr.
Sýǵa batyp ketken turǵyndardyń barshasy Kóksaraı aýylynda turatyn bir áýlettiń adamdary. Tipti tekteri de birdeı. Marqumdardyń eń úlkeni 40 jasta bolsa, eń kishisiniń jasy 6-da bolǵan.
Al, búgin jelide marqumdardy kómýge arnalyp jer qazylyp jatqany týraly vıdeo tarap ketti. Ondaǵy qatar qazylǵan jerdiń kórinisi árbir júrekti aýyrtary anyq.
Eske salaıyq, qaıǵyly jaǵdaı Otyrar aýdanyndaǵy Syrdarııa ózeninen ótetin kópir mańynda boldy. Sýǵa ketkenderdiń barlyǵy 4 aǵaıyndynyń otbasy músheleri, olar tyıym salynǵan jerge shomylýǵa barǵan.
Sýǵa ketken 11 adamnyń segiziniń denesi tabyldy. Qalǵan 3 adamnyń máıitin izdeý jalǵasyp jatyr.
