Bir aýdannan shyqqan 13 general: Jýaly – ofıtserler jeri
Jýaly dese, eń aldymen, oıymyzǵa bahadúr Baýyrjan men Sheraǵań túsedi. Degenmen, bul eki alyptan bólek, el ishinde Jambyl oblysyndaǵy Jýaly aýdany – generaldar eli atalyp ketken. Onyń birden bir sebebi – osy bir aıadaı aýdannan 13 generaldyń shyqqandyǵy.
Alataý men qart Qarataýdyń baýraıyndaǵy aýdan tárbıelep-ósirgen generaldar týraly qysqasha ret-retimen berýdi jón kórdik:
1. General-leıtenant Koveshnıkov Dmıtrıı Stepanovıch. Balalyq shaǵy Jýaly aýdanynyń Kólbastaý aýylynda ótken. 1943 jylǵy 17 qarashada Keńes Odaǵynyń Batyry ataǵy berilgen. 1998 jyly 17 jeltoqsanda Máskeý qalasynda dúnıeden ótti.
2. Baqytjan Ertaev - «Halyq Qaharmany», general-leıtenant. 1952 jyly 25 maýsymda Keńes (búgingi Ertaı) aýylynda dúnıege kelgen. Aýǵan soǵysynyń ardageri. 2008 jyly «Halyq Qaharmany» ataǵy berildi.
3. Seıitjan Meldebekuly Qoıbaqov, QR Ulttyq qaýipsizdik komıtetiniń general-maıory. 1954 jyly 5 naýryzda Shyńbulaq aýylynda týǵan.
4. Dıhanbek Janqorazuly Satylǵanov, Qazaqstan Qarýly Kúshteriniń general-maıory. 1954 jyly 7 mamyrda Shetbulaq aýylynda dúnıege kelgen. 2005 jyly general-maıor shenin aldy.
5. General-maıor Tregýbenko Vladımır Aleksandrovıch. 1945 jyly qazan aıynda Shaqpaq stansasynda týǵan. Aýǵanstandaǵy soǵysqa qatysqan. 1979 jyly oǵan general-maıor ataǵy berilgen. Búgingi tańda Máskeý qalasynda turady.
6. Trombachev Aleksandr Tımofeevıch, avıatsııa general-maıory. 1923 jyly B.Momyshuly (burynǵy Býrnoe) aýylynda dúnıege kelgen. General-maıor ataǵyn 56 jasynda alǵan. 1986 jyly Ordjonıkıdze atyndaǵy orta mektepte qyryq birinshi jyl túlekteriniń 45 jyldyq kezdesýine qatysqan.
7. General Chýmakov Roman Vasılevıch (shyn aty Rásilhan). 1928 jyly Baqaly ózeni saǵasyndaǵy Saryqaıqań degen jerde týǵan. Tórt-bes jasynda jetim qalǵan. Asharshylyq jyldary Nurlykent aýylynda ashylǵan balalar úıinde tárbıelengen. Balalar úıinde sol mekemeniń kúzetshisi Chýmakov Roman Vasılevıchtiń esimin alǵan. 1942 jyly arnaýly áskerı mektepke alynyp, Bishkek qalasynda oqıdy. Soǵystan keıin áskerı ýchılışeni, Máskeýdegi S.Ordjonıkıdze atyndaǵy avıatsııalyq ınstıtýtty bitirgen. 1961-1968 jyldary Vetnam, Kongo, Egıpet, Kýba memleketterindegi áskerı qımyldarǵa qatysqan. 1970-1981 jyldary Baltyq jaǵalaýyndaǵy PrıbOVO-da general sheninde armııa generaly qyzmetin atqarǵan. 1982 jyly otstavkaǵa shyǵyp, Máskeýde turaqtap qalǵan.
8. General-maıor Qýanyshbek Úshtaev. 1976 jyly 10 qazanda Kóltoǵan aýylynda týǵan. Qorǵanys mınıstrligi «Shyǵys» óńirlik qolbasshylyǵy áskerleriniń qolbasshysy.
9. Esen Demesinov – ishki ister qyzmetiniń general-maıory. 1938 jyly 15 sáýirde Qaırat aýylynda dúnıege kelgen. 2005 jyly dúnıeden qaıtty.
10. Táttibaı Dúısebaev – ishki ister qyzmetiniń general-maıory. 1923 jyly Amangeldi aýylynda týǵan. 1996 jyly dúnıeden ótti. Burynǵy Amangeldi aýyly búgingi tańda T.Dúısebaev aýyly bolyp atalady.
11. Arystanǵalı Rasylhanuly – ishki ister qyzmetiniń general-maıory. 1969 jyly Jańatalap aýylynda týǵan.
12. Ádilet general-maıory Ybyraev Tilebaldy Pirmanuly. 1928 jyly 10 qańtar kúni Jýaly aýdanyndaǵy Qyzyl Juldyz aýylynda dúnıege kelgen. 38 jasynda úshinshi synypty memlekettik ádilet – keńesshisi, ıaǵnı general- maıor atandy. 1999 jyly dúnıeden ótti.
13. Ádilet general-maıory Ǵabıt Tóreuly Mırazov. 1965 jyly 19 qańtarda Bılikól aýylynda dúnıege kelgen. 1983-1985 jyldary Aýǵanstan Respýblıkasynda azamattyq boryshyn ótegen.
