Bir aptanyń ishinde para alý kúdigimen ustalǵandar jarııalandy
Atap aıtqanda, «Agrarlyq nesıe korporatsııasy» aktsıonerlik qoǵamy basqarma tóraǵasynyń orynbasary sybaılas jemqorlyqqa kúdiktelýde. Ol qaramaǵyndaǵy qyzmetkerlerge eseptelgen syıaqy kóleminiń 50 paıyzyn para retinde qyzmette jalpy qamqorlyǵy úshin alyp otyrý boıynsha qylmystyq shema daıyndalǵan. Qazirgi tańda onyń qaramaǵyndaǵy qyzmetkerleri, ıaǵnı Shyǵys Qazaqstan jáne Qaraǵandy oblystaryndaǵy fılıal basshylarynan berilgen syıaqylardy qaıtaryp berý túrindegi 720 000 teńge para alý faktisi anyqtaldy. Sonymen qatar, búginde alynǵan qarjynyń jalpy kólemi anyqtalýda. Kúdikti ýaqytsha ustaý oqshaýlaǵyshyna qamaldy.
Budan bólek, ShQO boıynsha ulttyq bıýrosymen «Agrarlyq nesıe korporatsııasy» AQ oblystyq fılıalynyń basshysyna qatysty júıeli túrde para alý faktisi boıynsha qylmystyq is tergelýde. Kúdikti 2017-2018 jyldar aralyǵynda kásipkerden avtokólikterdi jalǵa alý týraly kelisimshartty uzartý, ıaǵnı is júzinde oryndalmaǵan qyzmetterge jalǵan atqarylǵan jumystar týraly aktige qol qoıý úshin júıeli túrde para alyp otyrǵany anyqtaldy. Qazirgi ýaqytta jalpy somasy 300 000 teńgeni quraıtyn para alý faktileri anyqtalǵan. Tergeý jalǵasýda.
Sonymen qatar, aǵymdaǵy jyldyń 11 qazanynda QR Іshki ister mınıstrliginiń Tótenshe jaǵdaılar komıtetiniń Almaty oblysynyń tótenshe jaǵdaılar departamentiniń bastyǵy, azamattyq qorǵaý polkovnıgi paraqorlyq kúdigimen áshkerelendi.
«Ol azamattardy jumysqa ornalastyrý úshin «Almaty oblysy tótenshe jaǵdaılar departamentiniń órt sóndirý jáne avarııalyq-qutqarý jumys qyzmeti» memlekettik mekemesiniń kadr jumysy bóliminiń bastyǵynan 300 000 teńge kóleminde para aldy dep kúdiktelýde.Ol óz kinásin tolyq moıyndaýyna baılanysty qamaýǵa alynǵan joq», - dedi resmı ókil.
Belgili bolǵandaı, bıyl 11 qazan kúni Sybaılas jemqorlyqqa qarsy is-qımyl ulttyq bıýrosynyń Aqmola oblysy boıynsha departamenti Şýchınsk qalasynyń Býrabaı aýdanynda qyzmet etetin Qorǵanys isteri jónindegi birlesken bólimi bastyǵynyń orynbasaryn paraqorlaq kúdigimen qolǵa túsirdi. Ol qala turǵynynan áskerge shaqyrýdy keıinge qaldyrý jáne áskerı bılet berý úshin 270 000 teńge aldy dep kúdiktelýde.
«Aǵymdaǵy jyldyń 12 qazany kúni sybaılas jemqorlyqqa baılanysty Almaty oblysy Qapshaǵaı qalasynda ornalasqan Qorǵanys mınıstrligi № 32363 áskerı bóliminiń kapıtan shenindegi shtab bastyǵy ustaldy. Ol qyzmette jalpy qamqorlyǵyna alý úshin áskerı qyzmetshilerden 170 000 teńge kóleminde zańsyz syıaqy alǵan dep kúdiktelýde. Tergep-tekserý jalǵasýda. Kinásin tolyq moıyndaýyna baılanysty áskerı qyzmetshilerge qatysty protsestik ustap alý qoldanylmady», - dedi Janna Bastarova.
Budan buryn habarlanǵandaı, Ózbekstandaǵy Qazaqstan elshisi bıýdjet qarajatyn jymqyrý boıynsha kúdikke ilindi.