Bir aptada medıtsınalyq poıyzdar 3 myńnan astam adamdy tekserýden ótkizdi

ASTANA. QazAqparat - Qazaqstan halqy Assambleıasynyń jylyna arnalǵan aktsııa aıasynda 2015 jylǵy 23 naýryz jáne 22 sáýir aralyǵynda «Meniń Qazaqstanym» ımıdjdik poıyzymen bir ýaqytta shyqqan «Densaýlyq», Járdem» jáne «Salamatty Qazaqstan» medıtsınalyq poıyzdary respýblıkanyń 42 temir jol stansasyna barýdy josparlaýda.

2010 jyldyń shilde aıynda iske qosylǵan konsýltatıvti-dıagnostıkalyq poıyzdary bizdiń elimizde kólik medıtsınasynyń damýyna bastaý boldy. Bundaı aýmaqty áleýmettik joba alǵash ret Memleket basshysy maquldaǵan «Salamatty Qazaqstan» memlekettik baǵdarlamasy aıasynda Qazaqstan Respýblıkasynyń Tótenshe jaǵdaılar jáne Densaýlyq saqtaý mınıstrligi men «Qazaqstan Temir Joly» UK» AQ arasynda jasalǵan memorandýmǵa sáıkes iske asyryldy.

QR ІІM Tótenshe jaǵdaılar komıtetiniń málimetinshe, medıtsınalyq poıyzdardyń arqasynda shalǵaıdaǵy stansalar men razezderdiń turǵyndary qajetti dıagnostıkalyq tekserýden ótedi, Qazaqstan Respýblıkasy Іshki ister mınıstrliginiń Tótenshe jaǵdaılar komıteti «Apattar medıtsınasy temirjol gospıtaldary» AQ-nyń joǵary bilikti mamandarynda emdeledi. Aktsııada halyqqa jan-jaqty medıtsınalyq kómek kórsetý kózdelgen. Poıyzdar zamanaýı dıagnostıkalyq medıtsınalyq jabdyqtarmen jaraqtalǵan. Ár medıtsınalyq poıyzda 18 mamandyq boıynsha joǵary jáne birinshi biliktilik sanatyndaǵy dárigerler jumys isteıdi.

Almaty qalasynan jiberilgen «Densaýlyq» poıyzy medıtsınalyq poıyzy Almaty men Jambyl oblystarynyń 15 stansasyna qyzmet kórsetedi. Astana qalasynan shyqqan «Salamatty Qazaqstan» poıyzy Qaraǵandy oblysynyń 20 stansasy turǵyndaryn tekserýden ótkizýge jiberildi. Aqtóbe qalasynan bastaý alǵan «Járdem» poıyzy Aqtóbe men Qyzylorda oblystarynyń 7 stansasy turǵyndaryn qamtýdy josparlaýda.

2015 jylǵy 24-29 naýryz aralyǵynda medıtsınalyq poıyzdardyń mamandary 12 stansanyń halqyna medıtsınalyq kómek kórsetti, 3036 adam, onyń ishinde 575 bala dárigerge qaraldy. Dárigerge kelgen adamdardyń sany 21 272-ni qurady. 12 286 dıagnostıkalyq zertteý júrgizildi, 130 shaǵyn ambýlatorııalyq ota jasaldy. Mammologqa 395 áıel adam qaraldy, 583 adamǵa stomatologııalyq kómek kórsetildi. Jumys nátıjesinde poıyzdar mamandary ártúrli aýrýmen aýyrǵan 2786 adamǵa, onyń ishinde 454 balaǵa medıtsınalyq kómek kórsetti.

2010 jyldan bastap konýltatıvti-dıagnostıkalyq poıyzdar respýblıkadaǵy barlyq óńirdiń 820 stansasyna bardy. Mamandar 228 899 turǵyndy tekserýden ótkizdi. Medıtsınalyq poıyzdardyń jumysy jalǵasýda.