Bir aptada Qazaqstanda negizgi azyq-túlik baǵalary qalaı ózgerdi?
ASTANA. QazAqparat - «Qazagromarketıng» AQ el aımaqtary boıynsha azyq-túlik baǵalaryna júrgizgen monıtorıngi 2015 jyldyń 7-14 sáýiri aralyǵynda bólshek saýda baǵalarynda birqatar ózgeristerdi anyqtady.
Atalǵan merzim ishinde bakaleıa ónimderinde baǵa ózgerisi oryn aldy. Atap aıtqanda, arpa jarmasy Astanada 14 paıyzǵa, ıaǵnı kelisine 133-ten 115 teńge deıin arzandaǵan. Baǵanyń tómendeýine bólshek saýdada qaptan ólshenip satylatyn ónim kóleminiń artýy men kóterme saýda baǵalarynyń 31 paıyzǵa tómendeýi sebep boldy. Al bıdaı jarmasy Astanada 14 paıyzǵa qymbattap, kelisi 158 teńge jetken, buǵan kóterme saýda baǵalarynyń 30 paıyzǵa qymbattaýy áser etken.
Et ónimderi arasynda Petropavlda shoshqa eti 10 paıyzǵa arzandaǵan, buǵan naryqtyń ónimmen tolyǵyp, kóterme saýda baǵasynda shoshqa etiniń kelisi 830-dan 750 teńgege arzandaýy áser etken. «Jemis-kókónis baǵalary mynadaı ózgeristerge ushyrady: júzim Astanada 11 paıyzǵa qymbattady. Buǵan ónimdi jetkizý kóleminiń azaıýy sebep boldy. Sol sekildi qııar Astana men Petropavlda 17 paıyzǵa deıin arzandady. Ónimniń arzandaýyna kókónisti jetkizý kóleminiń artýy men kóterme saýda baǵalarynyń tómendeýi sebep bolǵan. Pııaz baǵasy Óskemende 15 paıyzǵa, Astanada 13 paıyzǵa, Almatyda 11 paıyzǵa qymbattaǵan. Bul ónim qorynyń azaıýy men kókónisti saqtaýǵa ketken shyǵynnyń artýyna baılanysty oryn alǵan maýsymdyq baǵa ósimi bolyp tabylady», delingen baspasóz baıanynda. Balyq ónimderi arasynda móńke Aqtóbede 14 paıyzǵa qymbattady. Al sazan balyǵynyń baǵasy Aqtóbede 13 paıyzǵa ósken. Baǵalardyń bulaısha ósimine negizinen kóterme saýda baǵasynyń qymbattaýy men balyqty aýlaýǵa tyıym salý maýsymynyń bastalýy sebep bolǵanǵa uqsaıdy. Eske sala keteıik, «Qazagromarketıng» AQ apta saıyn ár seısenbi kúni azyq-túliktiń 66 túri boıynsha elimizdiń barlyq oblystarynda jáne Astana, Almaty qalalarynda baǵa monıtorıngin júrgizedi.
