Bir aptada elorda ózenderinen on tonna qoqys jınaldy
ASTANA. QazAqparat - Esil, Aqbulaq jáne Sarybulaq ózenderiniń arnasyn tazalaý boıynsha atqarylyp jatqan jumystyń aıasynda kún saıyn baldyr, shóp-shalań, turmystyq qaldyqtar sekildi qoqystar syrtqa kóptep shyǵarylýda, dep habarlady «Astana-Esil» MKQK mamany Muhıt Baqbergenuly.
Úsh ózenniń arnasyn qaldyqtardan tazartý boıynsha atqarylyp jatqan sharalardyń nátıjesi boıynsha, sońǵy apta ishinde jumysshylar 10 tonna qoqys jınaǵan.
«Úsh ózenniń ishinde «Sarybulaq» qoqysqa tolyp, qatty lastanǵan. Esil jáne Aqbulaq, sondaı-aq Sarybulaqtyń jaǵasy kún saıyn tazartylady. Biraq kúnniń kúrt ysýy baldyrlardyń kóptep ósýine septigin tıgizýde», - deıdi Baqbergenuly.
Jazǵy merzimde turmystyq qaldyqtar men qoqysty jınaýǵa 30 jumysshy tartylady. Mamannyń pikiri boıynsha, qala ózenderiniń qatty lastanýyna adamdardyń da qatysy bar.
«Úsh ózenniń arnasynan qoqys pen qaldyq tańerteńnen keshke deıin jınalady. Esil ózeniniń jaǵasy kún saıyn tazartylyp, sol aýmaqta qoqys tastaıtyn jáshikter men beınebaqylaýdyń bar bolǵanyna qaramastan, qaldyq kóp jınalyp, ózen arnasy qatty lastanady. Sarybulaq ózeniniń arnasynan kún saıyn bos shólmekter men temekiniń qaldyqtarynan jınalǵan ondaǵan qap qoqysty syrtqa shyǵaramyz. Bul turǵyda adamdardyń tabıǵatqa, óz qalalaryna janashyrlyqpen qaramaıynsha, jumysshylardyń eńbegin baǵalamaıynsha, nátıje osy kúıinde qala beredi degim keledi. Sol sebepti turǵyndardyń tazalyq máselesine salǵyrt qaramaýyn ótinemiz», -dedi Baqbergenuly.
