Bir aptada elimizde 3 myńnan astam qylmys tirkeldi

NUR-SULTAN. QazAqparat – Bir apta ishinde el aýmaǵynda 3230 qylmys tirkeldi. Bul týraly Іshki ister mınıstrliginiń ókili Shuǵyla Turlybek aıtty, dep habarlaıdy QazAqparat tilshisi.

«Eldegi krımınogendik jaǵdaıǵa toqtalsaq, bir apta ishinde 3230 qylmys jasaldy, onyń 2247-i táýlik ishinde ashyldy», - dedi Shuǵyla Turlybek Іshki ister mınıstrligi uıymdastyrǵan aptalyq brıfıngide.

Sonymen qatar, polıtsııa qyzmetkerleri «izin sýytpaı» 10 kisi óltirýdi, 4 ólimge ákep soqqan densaýlyqqa qasaqana aýyr zııan keltirýdi, bir qaraqshylyq, 28 tonaý jáne 475 bóten múlikti urlaý qylmystaryn ashty.

Budan bólek brıfıngide Іshki ister mınıstri Erlan Turǵymbaevtyń Parlament Májilisindegi Úkimet saǵatynda kótergen máseleleri jaıynda aıtyldy.

Ol depýtattyq korpýsqa respýblıkadaǵy qylmystyq jaǵdaı týraly baıandap, buryn sottalǵandarmen, kámeletke tolmaǵandarmen, mas kúıinde, qarýdy qoldana otyryp jasalǵan qylmystardyń tórtten bir bólikke azaıǵanyn, mundaı qylmystardyń ashylýynyń jaqsarǵanyn atap ótti jáne atalmysh oń úrdistiń sońǵy 3 jyl boıy saqtalyp kele jatqanyn habarlady. Sonymen qatar, ınternet-alaıaqtyq sanynyń ósýine nazar aýdaryldy.